বিগত প্ৰায় এমাহ ধৰি ৰাজ্যত অপৰিৱৰ্তিত হৈ আছে বান পৰিস্থিতি। ভয়ংকৰ বানপানীৰ ফলত এতিয়ালৈকে ৩৮ জন লোকৰ মৃত্যুৰ বাতৰি পোৱা গৈছে। উদ্বেগজনক ভাৱে যোৱা ২৪ ঘণ্টাত পানীত পৰি আৰু তিনিজন লোকে মৃত্যুক সাৱটি ল’ব লগা হৈছে। অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ (এএছডিএমএ) মতে এই তিনিজন লোকৰ ভিতৰত দুজনৰ ঘৰ তিনিচুকীয়া জিলাত আৰু এজনৰ ঘৰ ধেমাজি জিলাত।
বানৰ ফলত ২৮খন জিলাৰ ১১.৩৪ লাখৰো অধিক লোক প্ৰভাৱিত হৈছে। আটাইতকৈ বেছি প্ৰভাৱিত জিলাবোৰৰ ভিতৰত আছে লখিমপুৰ, দৰং, আৰু গোলাঘাট। কেৱল লখিমপুৰতেই ১৬৫,৩১৯ জন লোক বানৰ দ্বাৰা প্ৰভাৱিত হৈছে। ইয়াৰ বিপৰীতে দৰং জিলাত ১৪৭,১৪৩ জন আৰু গোলাঘাটত ১০৬,৪৮০ জন লোকক বানে ক্ষতিগ্ৰস্ত কৰিছে।
তদুপৰি ৪২,৪৭৬ হেক্টৰ খেতিৰ এলেকা প্লাবিত হৈছে আৰু ৮৪টা ৰাজহ চক্ৰৰ অধীনৰ ২,২০৮ খন গাঁও বানে প্ৰভাৱিত কৰিছে। ব্ৰহ্মপুত্ৰ, সোৱণশিৰি, বুঢ়ীদিহিং, দিখৌ, দিচাং, ধনশিৰি (এছ), জিয়া-ভৰলী, পুঠিমাৰী, কপিলি, বেঁকী, কুশিঁয়াৰা, বৰাক আৰু ধেলেশ্বৰীৰ দৰে ৰাজ্যৰ প্ৰধান নদী সমূহ বিভিন্ন স্থানত বিপদসীমাৰ ওপৰেৰে বৈ আছে।
প্ৰশাসনে ৪৮৯টা সাহায্য শিবিৰ আৰু বিতৰণ কেন্দ্ৰ স্থাপন কৰাৰ লগতে সুৰক্ষাৰ বাবে যাৱতীয় সকলো ধৰণৰ প্ৰচেষ্টা অব্যাহত ৰাখিছে। সৰ্বমুঠ প্ৰায় ২.৮৭ লাখ লোকে এই শিবিৰসমূহত আশ্ৰয় লৈ আছে। ইয়াৰ উপৰি বহু বানপীড়িত লোকে ওখ ঠাই, বিদ্যালয় বা ৰাস্তা আৰু দলঙত আশ্ৰয় গ্ৰহণ কৰিছে।
স্থানীয় প্ৰশাসন, সেনা তথা অৰ্ধসামৰিক বাহিনী আৰু এছডিআৰএফৰ সহায়ত উদ্ধাৰ অভিযান চলি আছে। বিগত মঙলবাৰে বিভিন্ন বানপীড়িত অঞ্চলৰ পৰা প্ৰায় ২,৯০০ গৰাকী লোকক উদ্ধাৰ কৰা হৈছে। প্ৰশাসনে ক্ষতিগ্ৰস্ত জনসাধাৰণৰ মাজত ১০,৭৫৪.৯৮ কুইন্টল চাউল, ১,৯৫৮.৮৯ কুইন্টল দাইল, ৫৫৪.৯১ কুইন্টল নিমখ আৰু ২৩,০৬১.৪৪ লিটাৰ সৰিয়হৰ তেল বিতৰণ কৰিছে। প্ৰয়োজন সাপেক্ষে অঞ্চলভেদে পশুধনৰ বাবে খাদ্যও প্ৰদান কৰা হৈছে।
বানপানীৰ ফলত ৮,৩২,০৯৯টা পশুধন প্ৰভাৱিত হৈছে। ৭৪টা পথ, ৬ খন দলং আৰু ১৪টা মাথাউৰি ক্ষতিগ্ৰস্ত হৈছে তথা ৫টা মাথাউৰি সম্পূৰ্ণৰূপে ভাঙি গৈছে। গতিকে এই সংকটজনক পৰিস্থিতিৰ পৰিপ্ৰেক্ষিতত প্ৰশাসন আৰু চৰকাৰৰ সহায় বিচাৰিছে বানপীড়িত জনতাই।
