ৰাঁচি জেইলৰ পৰা মুক্তি লাভ কৰাৰ পিছত পুনৰবাৰ ঝাৰখণ্ডৰ মুখ্যমন্ত্ৰীৰূপে শপত ল’বলৈ সাজু হৈছে হেমন্ত চোৰেন। আজি অনুষ্ঠিত হ’বলগীয়া ঝাৰখণ্ড মুক্তি মৰ্চা চমুকৈ জে এম এমৰ বিধায়কৰ বৈঠকত হেমন্ত চোৰেনক বিধায়িনী দলৰ নেতা হিচাপে নিৰ্বাচিত কৰিব বুলি ৰাষ্ট্ৰীয় জনতা দলৰ নেতা তথা ঝাৰখণ্ডৰ মন্ত্ৰী সত্যানন্দ ভোক্তাই জানিবলৈ দিয়ে।
বিধায়িনী দলৰ নেতা হিচাপে নিৰ্বাচিত হোৱাৰ পিছতে বৰ্তমানৰ মুখ্যমন্ত্ৰী চম্পাই চোৰেনে নিজৰ পদবীৰ পৰা পদত্যাগ কৰিব আৰু তাৰ পিছতেই হেমন্ত চোৰেনে পুনৰবাৰ ৰাজ্যখনৰ মুখ্যমন্ত্ৰীৰূপে শপত ল’ব। চোৰেনৰ লগতে আন কেইবাজনো নেতাই মন্ত্ৰীৰূপে শপত লোৱাৰ সম্ভাৱনা আছে।
জেইলৰ পৰা জামিনত মুক্তি পোৱা হেমন্ত চোৰেনৰ নেতৃত্বত এইখনেই প্ৰথম আনুষ্ঠানিক বৈঠক। কাৰাগাৰৰ পৰা মুক্তি পোৱাৰ পিছৰে পৰা হেমন্ত চোৰেনে পুনৰবাৰ ঝাৰখণ্ডৰ মুখ্যমন্ত্ৰী হিচাপে শপত গ্ৰহণ কৰিব পাৰে বুলি জল্পনা-কল্পনাৰ সৃষ্টি হৈছিল।
বিৰোধী মিত্ৰজোঁট ইণ্ডিয়াত অন্তৰ্ভুক্ত সকলো ৰাজনৈতিক দলৰ নেতা তথা বিধায়কসকলক আজিৰ বৈঠকত উপস্থিত থকাৰ নিৰ্দেশ প্ৰদান কৰা হৈছে। মুখ্যমন্ত্ৰী চম্পাই চোৰেনেও ইতিমধ্যে আজিৰ সকলো কাৰ্যসূচী বাতিল কৰিছে।
উল্লেখ্য যে, ভূমি কেলেংকাৰি গোচৰত পাঁচমাহ পূৰ্বে গ্ৰেপ্তাৰ হোৱা হেমন্ত চোৰেনক ঝাৰখণ্ড উচ্চ ন্যায়ালয়ে যোৱা ২৮ জুনত জামিন প্ৰদান কৰিছিল। চলিত বৰ্ষৰ ৩১ জানুৱাৰিৰ নিশা প্ৰৱৰ্তন সঞ্চালকালয়ে দীৰ্ঘ সময় ধৰি চলোৱা জেৰাৰ অন্তত তেওঁক গ্ৰেপ্তাৰ কৰিছিল।
