২০২৪ চনৰ টি-২০ বিশ্বকাপৰ বিজয় উদযাপন শেষ নহওঁতেই অসম সন্তান ৰিয়ান পৰাগ আৰু প্ৰাক্তন ভাৰতীয় বেগী বলাৰ এছ শ্ৰীশান্তৰ মাজত এক নতুন বিতৰ্কৰ সূচনা হৈছে।
কিছুদিন পূৰ্বে ভাৰতৰ টি-২০ বিশ্বকাপৰ খেল নাচাওঁ বুলি কৈ বিতৰ্কত সোমাই পৰিছিল ৰিয়ান পৰাগ। এতিয়া এই মন্তব্যৰ প্ৰত্যুত্তৰ দিবলৈ গৈ প্ৰাক্তন ক্ৰিকেটাৰ শ্ৰীশান্তে ৰিয়ানক দিছে কঠোৰ সকিয়নী।
এইবাৰ আই পি এল ২০২৪ত ৰাজস্থান ৰয়েলছৰ হৈ ৫৩১ ৰাণ সংগ্ৰহ কৰিছে ৰিয়ান পৰাগে। দুৰ্দান্ত প্ৰদৰ্শনৰ পিছত চৰ্চাৰ কেন্দ্ৰ বিন্দু হৈ পৰা ৰিয়ানক বিশ্বকাপ সম্পৰ্কে সোধা প্ৰশ্নৰ উত্তৰত তেওঁ কৈছিল, ‘এইটো এটা পক্ষপাতিত্বমূলক উত্তৰ হ’ব (ভাৰত শীৰ্ষ চাৰিটা দলৰ ভিতৰত থকাৰ ভৱিষ্যতবাণী) যদিও অতি সততাৰে ক’ব বিচাৰোঁ যে মই বিশ্বকাপ চাব নিবিচাৰো। মই কেৱল কোনে বিশ্বকাপ জয়ী হয় সেয়া চাম আৰু তাতেই মই সুখী হ’ম। যেতিয়া মই বিশ্বকাপত খেলিম তেতিয়া ময়ো শীৰ্ষ চাৰিটা স্থান আৰু আন সকলোবোৰ কথাৰ বিষয়ে চিন্তা কৰিম।’
ইয়াৰ বিপৰীতে টি-২০ বিশ্বকাপ চলি থকাৰ মাজত পৰাগৰ মন্তব্যৰ প্ৰত্যুত্তৰ দিয়াৰ সময়ত কাৰো নাম উল্লেখ কৰা নাছিল দুবাৰৰ বিশ্বকাপ বিজয়ী খেলুৱৈ শ্ৰীশান্তে৷
বিশ্বকাপ ২০২৪ৰ ফাইনেলৰ সময়ত ষ্টাৰ স্পৰ্টছত চলি থকা এক অনুষ্ঠানত শ্ৰীশান্তে কয়, ‘দুই-এজন যুৱ খেলুৱৈয়ে এইটোও কৈছে যে তেওঁলোকে বিশ্বকাপৰ খেল নাচায় কাৰণ তেওঁলোকক নিৰ্বাচকে বিশ্বকাপ খেলাৰ বাবে নিৰ্বাচন নকৰিলে। প্ৰথমে আপুনি দেশপ্ৰেমী হোৱা উচিত তাৰ পিছত আপুনি ক্ৰিকেট প্ৰেমী হওঁক। কিন্তু যিসকলে দলটো বাছনি কৰিছে তেওঁলোকক আমি মানসিকভাৱে আৰু আৱেগিকভাৱে সমৰ্থন কৰা উচিত।’
যুৱ খেলুৱৈসকলে ব্যক্তিগত হতাশাতকৈ ৰাষ্ট্ৰৰ সন্মানক অগ্ৰাধিকাৰ দিয়াৰ প্ৰয়োজন বুলিও প্ৰাক্তন বেগী বলাৰজনে মত প্ৰকাশ কৰে। লগতে নিজৰ দলটোক সমৰ্থন কৰিবলৈ আৰু নিৰ্বাচকসকলৰ সিদ্ধান্তক আন্তৰিকতাৰে সন্মান কৰিবলৈ সকলোকে আহ্বান জনায়।
উল্লেখ্য যে ৰিয়ান পৰাগে ৬ জুলাইৰ পৰা জিম্বাবৱেৰ বিৰুদ্ধে হ’বলগীয়া পাঁচখন মেচৰ টি-২০ শৃংখলাৰ বাবে ভাৰতীয় দলত স্থান লাভ কৰিছে। উল্লেখ্য যে এই শৃংখলাটোতেই অভিষেক শৰ্মা, তুষাৰ দেশপাণ্ডে আৰু ধ্ৰুৱ জুৰেলৰ সৈতে ৰিয়ান পৰাগে শুভমান গিলৰ নেতৃত্বত আন্তঃৰাষ্ট্ৰীয় মঞ্চত প্ৰথমবাৰৰ বাবে নিজকে প্ৰমাণ কৰাৰ সুযোগ লাভ কৰিব।
