শুকুৰবাৰে ৰাতিপুৱা নেপালত সংঘটিত হয় এক ভয়ংকৰ ভূমিস্খলনৰ ঘটনা। ভূমিস্খলনৰ ফলত দুখন যাত্ৰীবাহী বাছ নদীত পৰি যোৱাৰ ফলত কমেও ৬৩ জন যাত্ৰী নিৰুদ্দেশ হোৱা বুলি জানিব পৰা গৈছে।
তথ্য অনুসৰি চিতৱান জিলাৰ ছিমলতাল অঞ্চলৰ নাৰায়ণঘাট-মুগলিং পথত সংঘটিত হয় এই ঘটনা। অকস্মাতে হোৱা ভূমিস্খলনৰ ফলত বাছ দুখন ত্ৰিশূলী নদীত পৰি যোৱা বুলি জানিব পৰা গৈছে।
কিছু দিনৰ পৰা হৈ থকা ধাৰাসাৰ বৰষুণ ফলত ত্ৰিশূলী নদীৰ বক্ষ ওফন্দি উঠাৰ বাবে অনুসন্ধান আৰু উদ্ধাৰ অভিযান চলোৱাত যথেষ্ট বাধাৰ সন্মুখীন হৈছে উদ্ধাৰকাৰী দল।
চিতৱানৰ মুখ্য জিলা বিষয়া ইন্দ্ৰদেৱ যাদৱে সংবাদ মাধ্যমক কয়, ‘প্ৰাথমিক তথ্য অনুসৰি বাছ চালককে ধৰি দুয়োখন বাছতে মুঠ ৬৩জন লোক আছিল। পুৱতি নিশা প্ৰায় ৩:৩০ বজাত হোৱা ভূমিস্খলনত বাছ দুখন নদীত পৰি যায়। আমি ঘটনাস্থলত আছো আৰু অনুসন্ধান অভিযান অবিৰতভাৱে চলি আছে। ধাৰাসাৰ বৰষুণৰ বাবে বাছ দুখনৰ সন্ধান উলিওৱাত কিছু অসুবিধাৰ সন্মুখীন হৈছো’।
ইফালে এই ঘটনাত দুখ প্ৰকাশ কৰি নেপালৰ প্ৰধানমন্ত্ৰী পুষ্প কমল দাহালে এক্সযোগে কয় যে নাৰায়ণগড়-মুগলিং পথৰ অংশত হোৱা ভূমিস্খলনৰ ফলত দুখন বাছ নৈত পৰি যায়। এই ঘটনাত প্ৰায় পাঁচ ডজন যাত্ৰী নিৰুদ্দেশ হৈ পৰে। মই গভীৰ শোক প্ৰকাশ কৰিছো। যাত্ৰীসকলক বিচাৰি উলিয়াবলৈ গৃহ প্ৰশাসনকে ধৰি চৰকাৰৰ সকলো সংস্থাক নিৰ্দেশ প্ৰদান কৰিছো।
