১২৮ বছৰৰ অন্তত পুনৰ অলিম্পিকলৈ ঘূৰি আহিছে ক্ৰিকেট। ২০২৮ চনত আমেৰিকা যুক্তৰাষ্ট্ৰৰ লছ এঞ্জেলছত হ’বলগীয়া অলিম্পিকৰ আয়োজক সমিতিয়ে ক্ৰিকেটৰ সময়সূচী ঘোষণা কৰিছে।
প্ৰতিযোগিতাখন ১৪ জুলাইৰ পৰা আৰম্ভ হ’ব যদিও ক্ৰিকেটৰ খেলসমূহ ইয়াৰ দুদিন আগৰ পৰাই আৰম্ভ হ’ব। পুৰুষ আৰু মহিলাৰ বাবে টি-২০ ফৰ্মেটত হ’বলগীয়া খেলসমূহ ১২ জুলাইৰ পৰা ২৯ জুলাইলৈকে চলিব। মেডেলৰ বাবে খেলিবলগীয়া মেচ ১৯ আৰু ২৯ জুলাইত অনুষ্ঠিত হ’ব।
ক্ৰিকবাজৰ এক প্ৰতিবেদন অনুসৰি, ক্ৰিকেটৰ সময়সূচী দুটা ভাগত বিভক্ত কৰা হৈছে। প্ৰথম অংশৰ মেচসমূহ ১২ৰ পৰা ১৮ জুলাইৰ ভিতৰত হ’ব। প্ৰথম অংশৰ মেডেলৰ মেচ অনুষ্ঠিত হ’ব ১৯ জুলাইত।
আনহাতে দ্বিতীয় ভাগৰ মেচসমূহ ২২ৰ পৰা ২৮ জুলাইৰ ভিতৰত হ’ব। দ্বিতীয় ভাগৰ মেডেলৰ মেচ অনুষ্ঠিত ২৯ জুলাইত।
অৱশ্যে এই পৰ্যন্ত স্পষ্ট হোৱা নাই যে প্ৰথমে পুৰুষৰ খেল হ’ব নে মহিলাৰ। এই সন্দৰ্ভত অধিক তথ্য চলিত বছৰৰ অন্তিমটো মাহত সবিস্তাৰে প্ৰকাশ পাব।
আয়োজক সমিতিয়ে ইতিমধ্যেই ঘোষণা কৰি থৈছে যে বিশ্বৰ সৰ্ববৃহত প্ৰতিযোগিতাখনত ছটা দলে টি-২০ ফৰ্মেটত খেলিব। পুৰুষ আৰু মহিলা উভয়ৰ বাবে এই সংখ্যা একেই। প্ৰতিটো দলত সৰ্বাধিক ১৫ জন সদস্য থাকিব।
প্ৰতিযোগিতাখনৰ ক্ৰিকেট মেচসমূহ ফেয়াৰগ্ৰাউণ্ড ক্ৰিকেট ষ্টেডিয়ামত অনুষ্ঠিত হ’ব, যিখন লছ এঞ্জেলছৰ পৰা ৪৮ কিলোমিটাৰ নিলগত।
এই পৰ্যন্ত এটা কথা নিশ্চিত হোৱা নাই যে প্ৰতিযোগিতাখনত অংশ ল’বলগীয়া দলসমূহে কিদৰে যোগ্যতা অৰ্জন কৰিব। অহা ১৭ জুলাইৰ পৰা ২০ জুলাইলৈকে ছিংগাপুৰত অনুষ্ঠিত হ’বলগীয়া আন্তঃৰাষ্ট্ৰীয় ক্ৰিকেট পৰিষদ (আই চি চি)ৰ বাৰ্ষিক অধিৱেশনত এই সন্দৰ্ভত আলোচনা হোৱাৰ সম্ভাৱনা আছে।
