ছত্তীশগড়ত হোৱা সুৰা কেলেংকাৰী গোচৰৰ তদন্ত কৰি থকা প্ৰৱৰ্তন সঞ্চালকালয়ে বৃহৎ পদক্ষেপ গ্ৰহণ কৰি সুকমা জিলাস্থিত কংগ্ৰেছৰ কাৰ্যালয় ছীল কৰি দিছে। তদন্তকাৰী সংস্থাটোৰ এই পদক্ষেপৰ পিছতে কংগ্ৰেছ দল আৰু কৰ্মীৰ মাজত আক্ৰোশ দেখা পৰিলক্ষিত হৈছে।
ইডিৰ এই পদক্ষেপক কংগ্ৰেছে ৰাজনীতিকৰণ আখ্যা দিয়াৰ বিপৰীতে বিজেপিয়ে কয় যে দুৰ্নীতি কৰাসকলে শাস্তি ভোগ কৰিবই লাগিবই।
ইয়াৰ উপৰি সুৰা কেলেংকাৰীৰ তদন্ত কৰি থকা ইডিয়ে ভূপেশ চৰকাৰৰ সময়ৰ আবকাৰী মন্ত্ৰী কবাছী লখমাৰ সুকমা আৰু ৰায়পুৰস্থিত অট্টালিকাও ছীল কৰিছে। ইডিয়ে কয় যে লখমাই আবকাৰী মন্ত্ৰী হৈ থকা সময়ত দুৰ্নীতিৰে সংগ্ৰহ কৰা ধনেৰে সুকমা জিলাত কংগ্ৰেছ কাৰ্যালয় নিৰ্মাণ কৰিছিল।
আনহাতে লখমাৰ পুত্ৰই নিৰ্মাণ কৰা বাসগৃহও এই দুৰ্নীতিৰ ধনেৰে নিৰ্মাণ কৰিছিল। এই কথা উল্লেখ কৰিয়েই ইডিয়ে এইসমূহ সম্পত্তি ছীল কৰিছে।
ইডিৰ এই পদক্ষেপৰ পিছতেই সমগ্ৰ ছত্তীশগড়তে কংগ্ৰেছ দলৰ মাজত ক্ষোভ বৃদ্ধি পোৱা পৰিলক্ষিত হৈছে আৰু ইয়াৰ বিৰুদ্ধে আজি সমগ্ৰ ৰাজ্যখনৰে জিলাই জিলাই থকা কাৰ্যালয়ত প্ৰতিবাদী কাৰ্যসূচী গ্ৰহণ কৰে।
প্ৰতিবাদকাৰীয়ে ইডি আৰু কেন্দ্ৰ চৰকাৰৰ পুত্তলিকা দাহ কৰি প্ৰতিবাদ সাব্যস্ত কৰে। বিজেপিয়ে ক্ষমতাৰ অপব্যৱহাৰ কৰি এনেধৰণৰ কাণ্ড সংঘটিত কৰাৰ অভিযোগ তোলে।
