আজি গোৱালপাৰা জিলাৰ কৃষ্ণাইৰ পাইকানৰ উচ্ছেদস্থলীত উপস্থিত হোৱা আৰক্ষী-প্ৰশাসনৰ ওপৰত সংঘটিত ভয়ংকৰ আক্ৰমণ সন্দৰ্ভত মত ব্যক্তি কৰিছে শীৰ্ষ আৰক্ষী বিষয়া অখিলেশ সিঙে।
আজি উচ্ছেদস্থলীত শ-শ অবৈধ দখলকাৰী লোকে আৰক্ষী আৰু বন বিভাগৰ লোকক আক্ৰমণ কৰা ঘটনাৰ সৈতে জড়িত প্ৰত্যেকগৰাকী লোকৰ বিৰুদ্ধে কঠোৰ ব্যৱস্থা লোৱা হ’ব বুলি IGP অখিলেশ সিঙে মন্তব্য কৰে।
দুধনৈত উপস্থিত হৈ শীৰ্ষ আৰক্ষী বিষয়াগৰাকীয়ে কয়, ‘আৰক্ষী-প্ৰশাসনক আক্ৰমণ কৰা কাৰ্য সহ্য কৰা নহ’ব। ঘটনাত জড়িত লোকসকলক চিনাক্ত কৰা হৈছে। কাকো এৰি দিয়া নহ’ব, কঠোৰ এক্সন লোৱা হ’ব।’
উচ্ছেদৰ জৰিয়তে খালী কৰা ঠাইখিনিত ভৱিষ্যতে যাতে কোনো লোকে প্ৰৱেশ নকৰে তাৰ বাবেও সকীয়নি প্ৰদান কৰে আৰক্ষী বিষয়াগৰাকীয়ে।
উল্লেখ্য যে, বৃহস্পতিবাৰে পুৱা কৃষ্ণাইৰ উচ্ছেদস্থলীত উপস্থিত হৈছিল আৰক্ষী-প্ৰশাসনৰ লগতে বন বিভাগৰ লোক। এই দলটো দেখা মাত্ৰকে উচ্ছেদিত লোকসকলে তীব্ৰ বাক-বিতণ্ডাত লিপ্ত হয়। বাক-বিতণ্ডাৰ মাজতেই উচ্ছেদিত লোকসকলে আৰক্ষী-প্ৰশাসনৰ দলটোক উদ্দেশ্যি শিলাবৰ্ষণ আৰম্ভ কৰে৷
আৰক্ষীয়ে পৰিস্থিতি নিয়ন্ত্ৰণ কৰিবলৈ শূন্যলৈ গুলীচালনা কৰে আৰু এই গুলীচালনাত দুৰ্ভাগ্যজনকভাৱে বিদ্যাপাৰাৰ ছাকুৱাত হুছেইন নামৰ এজন লোক থিতাতে নিহত হয়। আনহাতে কুতুবুদ্দিন আলী নামৰ আন এজন লোক গুৰুতৰভাৱে আহত হয়।
আনহাতে সন্দেহজনক লোকৰ আক্ৰমণত কেইবাগৰাকীও আৰক্ষী-প্ৰশাসনৰ লোকৰ লগতে বন বিভাগৰ লোক গুৰুতৰভাৱে আহত হয়।
ইফালে পাইকানত সংঘটিত হোৱা ভয়ংকৰ ঘটনা সন্দৰ্ভত ইতিমধ্যেই প্ৰতিক্ৰিয়া ব্যক্ত কৰি মুখ্যমন্ত্ৰী ড০ হিমন্ত বিশ্ব শৰ্মাই ঘটনাত জড়িত লোকক এজন এজনকৈ চিনাক্ত কৰি বিহিত শাস্তি প্ৰদান কৰা হ’ব বুলিও হুংকাৰ প্ৰদান কৰিছে।
