অহা ১২ জুলাইত বিবাহ পাশত আৱদ্ধ হ’ব ছ’চিয়েল মিডিয়া তথা সংবাদ মাধ্যমত খুব চৰ্চিত যুটি অনন্ত আম্বানী আৰু ৰাধিকা মাৰ্চেণ্ট। বহু নামি দামী তাৰকাৰ উপস্থিতিত অনুষ্ঠিত হ’বলগীয়া এই বিয়াখনত কানাডিয়ান গায়ক জাষ্টিন বিবাৰে সংগীতানুষ্ঠান পৰিৱেশন কৰিব।
কানাডিয়ান গায়ক জাষ্টিন বিবাৰ আহিব ভাৰতলৈ। অনন্ত আম্বানী আৰু ৰাধিকা মাৰ্চেণ্টৰ বিবাহ উপলক্ষ্যে নিজৰ অনুষ্ঠান পৰিৱেশন কৰিব বিবাৰে। তেওঁ অতি শীঘ্ৰে মুম্বাইত উপস্থিত হ’ব বুলি জানিব পৰা গৈছে। লগতে আম্বানী পৰিয়ালে আয়োজন কৰিছে একাধিক অনুষ্ঠানৰ।
ইয়াৰ পূৰ্বে, পপ কুইন ৰিহানাই জামনগৰত অনুষ্ঠিত হোৱা অনন্ত আৰু ৰাধিকাৰ প্ৰাক-বিবাহ অনুষ্ঠানত অংশগ্ৰহণ কৰিছিল। জামনগৰ অনুষ্ঠানৰ পাছত, জুনত ক্ৰ’জ পাৰ্টীত বেকষ্ট্ৰীট বয়জ, পিটবুল আৰু ইটালীৰ অপেৰা গায়িকা এণ্ড্ৰিয়া বোচেলিৰ অনুষ্ঠান প্ৰদৰ্শন কৰা হৈছিল।
মুকেশ আম্বানী আৰু নীতা আম্বানীৰ কনিষ্ঠ পুত্ৰ অনন্তৰ বিবাহৰ বাবে ২৯ জুনত আম্বানীৰ এণ্টিলিয়া বাসভৱনত এক পূজাৰ আয়োজন কৰা হৈছিল। ইয়াৰ পাছত ২ জুলাইত আম্বানীয়ে ৫০ জনতকৈও অধিক সুবিধাবঞ্চিত দম্পতীৰ বাবে এক গণ বিবাহৰ আয়োজন কৰিছিল।
৩ জুলাইত অনন্ত আম্বানী আৰু ৰাধিকা মাৰ্চেণ্টৰ পৰিয়ালে এণ্টিলিয়াত এক মামেৰু অনুষ্ঠানৰ বাবে একত্ৰিত হৈছিল। অনুষ্ঠানটোৰ ফ’টো আৰু ভিডিঅ’ ইতিমধ্যে সামাজিক মাধ্যমত শ্বেয়াৰ কৰা হৈছে।
ৰাধিকা মাৰ্চেণ্ট আৰু অনন্ত আম্বানীয়ে ১২ জুলাইত মুম্বাইৰ জিঅ’ ৱ’ৰ্ল্ড কনভেনচন চেণ্টাৰত বিবাহ পাশত আৱদ্ধ হ’ব। তেওঁলোকৰ এই বিবাহ, তিনিটা অনুষ্ঠানত অন্তৰ্ভুক্ত কৰা হৈছে- “শুভ বিবাহ” আৰু তাৰ পিছত ১৩ জুলাইত “শুভ আৰ্শীবাদ” আৰু ১৪ জুলাইত “মঙ্গল উৎসৱ” বা “বিবাহৰ অভ্যৰ্থনা”।
