আমেৰিকাৰ দক্ষিণ কেৰ’লিনাত ব্ৰেড ছিগমেন (৬৭) নামৰ এজন লোকক প্ৰাক্তন প্ৰেমিকাৰ পিতৃ-মাতৃক হত্যা কৰাৰ অভিযোগত শুকুৰবাৰে ফায়াৰিং স্কোৱাডৰ জৰিয়তে মৃত্যুদণ্ড বিহা হয়। ইয়াৰ পূৰ্বে আমেৰিকাত অন্তিমবাৰৰ বাবে ২০১০ চনত ফায়াৰিং স্কোৱাডৰ দ্বাৰা কোনো লোকক মৃত্যুদণ্ড বিহা হৈছিল।
জে’লৰ মুখপাত্ৰ ক্ৰিষ্টী শ্বেনে কয় যে ব্ৰেড ছিগমেনে ২০০১ চনত ডেভিড আৰু গ্লেডিছ লাৰ্কক বেছবল বেটেৰে হত্যা কৰা বুলি স্বীকাৰ কৰিছিল। ৰাজ্যখনৰ ৰাজধানী কলম্বিয়াৰ ব্ৰড ৰিভাৰ কাৰেকচনেল ইনষ্টিটিউচনত তিনিজনীয়া ফায়াৰিং স্কোৱাডে তেওঁক গুলীয়াই হত্যা কৰে।
ফায়াৰিং স্কোৱাডে কয়দীজনৰ মূৰটো ঢাকি ৰাখি এখন বহাই দিয়ে। তাৰ পিছত তেওঁৰ হাত-ভৰি বান্ধি দিয়া হয়। প্ৰট’কল অনুসৰি, ৱাৰ্ডেনে ফাঁচীৰ আদেশ পঢ়াৰ পিছত স্কোৱাডে গুলীচালনা কৰে।
সাধাৰণতে অপৰাধীজনৰ বুকুক লক্ষ্য কৰি গুলী নিক্ষেপ কৰা হয়। এই গুলী ১৫ ফুট দূৰত্বৰ পৰা নিক্ষেপ কৰা হয়। বন্দী আৰু ফায়াৰিং স্কোৱাডৰ মাজত থাকে এখন দেৱাল। এনে পৰিস্থিতিত বন্দীয়ে কোনে তেওঁক গুলীয়াইছে সেয়া দেখা নাপায়।
উল্লেখ্য যে, ছিগমেনে শেষ মুহূৰ্তত উচ্চতম ন্যায়ালয়ত মৃত্যুদণ্ডৰ ৰায় স্থগিত ৰখাৰ বাবে আবেদন জনাইছিল যদিও সেয়া নাকচ কৰা হয়। দক্ষিণ কেৰ’লিনাৰ গৱৰ্ণৰ হেনৰী মেকমাষ্টাৰেও তেওঁৰ ক্ষমাৰ আবেদন নাকচ কৰে।
