ভয়ানক খোৱাপানীৰ সংকটত পৰিছে দিল্লীবাসী। ৫০ লাখ গেলেনতকৈ অধিক পানীৰ নাটনিৰ বাবে পিয়াহত ককবকাইছে দিল্লীবাসীয়ে। দিন পাৰ হোৱাৰ লগে লগে দিল্লীত অভাৱ হৈ পৰিছে খোৱাপানীৰ। পানীৰ বাবেই এতিয়া হস্তক্ষেপ কৰিব লগীয়া হৈছে উচ্চতম ন্যায়ালয়ে।
এই পৰ্যন্ত কোনো সমাধান ওলোৱা নাই দিল্লীত। আম আদমী পাৰ্টীক ইতিমধ্যে নিৰ্দেশ দিছে উচ্চতম ন্যায়ালয়ে। যমুনা জল ব’ৰ্ডলৈ গৈ অতিৰিক্ত পানী প্ৰদান কৰিবলৈ আবেদন কৰিবলৈ আদেশ জাৰি কৰিলে উচ্চতম ন্যায়ালয়ে। দিল্লী চৰকাৰৰ মতে ৫০ লাখ লিটাৰ পানী নাটনি হৈ আছে দিল্লীত।
এখন বা দুখন পানীৰ টেংকাৰে একোটাকৈ বস্তি এলেকাত প্ৰদান কৰি আছে খোৱা পানী। পানীৰ বাবেই এতিয়া উচ্চতম ন্যায়ালয়ত চলিছে শুনানি।
আনহাতে কেজৰিৱাল চৰকাৰৰ মতে পানীৰ মাফিয়াৰ বাবেই পানীৰ সংকটত পৰিছে দিল্লীবাসী। এই গম্ভীৰ বিষয়টোক লৈ আৰম্ভ হৈছে ৰাজনীতি। বিজেপিৰ প্ৰদেশ অধ্যক্ষৰ মতে দিল্লীবাসীয়ে বিদায় দিব লাগে কেজৰিৱাল চৰকাৰক।
ইফালে পানী যোগান ধৰাৰ প্ৰতিশ্ৰুতি দিয়া হিমাচল চৰকাৰে বন্ধ কৰি দিছে খোৱাপানী। কোনো কাৰণতে দিল্লীলৈ পানীৰ যোগান নধৰে পানী। হিমাচলৰ কংগ্ৰেছ চৰকাৰৰ মতে দিল্লীক পানী যোগান ধৰাৰ বাবে হিমাচলত নাই অতিৰিক্ত পানী।
উল্লেখ্য যে দিল্লীয়ে খোৱাপানীৰ বাবে নিৰ্ভৰ কৰিবলগীয়া হয় হাৰিয়ানা, হিমাচল প্ৰদেশ, উত্তৰাখণ্ড আৰু উত্তৰ প্ৰদেশৰ ওপৰত। যমুনা নদীৰ ৪০ শতাংশ পানী যোগান ধৰা হয় দিল্লীত। গতিকে পানীৰ ৰাজনীতিয়ে এতিয়া গৰম কৰি তুলিছে দেশৰ ৰাজধানী দিল্লী।
