আম আদমী পাৰ্টী চমুকৈ আপৰ নেতাৰ বিৰুদ্ধে পুনৰ কঠোৰ হৈছে প্ৰৱৰ্তন সঞ্চালকালয় (ইডি)। এইবাৰ সংস্থাটোৰ ৰোষত পৰিছে দলটোৰ ওখলাৰ বিধায়ক অমনাতুল্লাহ খান। প্ৰায় ৫ ঘণ্টা ধৰি চলোৱা জেৰাৰ অন্তত আজি গ্ৰেপ্তাৰ হয় অমনাতুল্লাহ খান।
বিধায়কগৰাকীক জেৰা চলাবলৈ আজি ৰাতিপুৱা ৭ বজাত ইডিৰ এটা দল উপস্থিত হৈছিল নেতাগৰাকীৰ বাসগৃহত। কিন্তু বিধায়কগৰাকীয়ে প্ৰায় দুঘণ্টা সময় ঘৰৰ দুৱাৰ খুলি নিদিয়াত বাহিৰতে অপেক্ষা কৰিবলগীয়া হৈছিল ইডিৰ দলটো।
তালাচী আৰু জেৰা চলাবলৈ যোৱা ইডিৰ দলটোৰ সৈতে বাকবিতণ্ডাত লিপ্ত হোৱা বুলিও বিধায়কগৰাকীৰ বিৰুদ্ধে অভিযোগ উত্থাপন হৈছে। বিধায়কগৰাকীয়ে নিজেই ছ’চিয়েল মিডিয়াৰ জৰিয়তে ইডিয়ে জেৰা চলোৱাৰ কথা ৰাজহুৱা কৰিছে।
দিল্লী ৱাকফ বোৰ্ডৰ অধ্যক্ষ হিচাপে চৰকাৰী নীতি- নিৰ্দেশনাক ভেঙুচালি কৰি বিভিন্ন অনিয়মেৰে বিভিন্নজনক চাকৰি দিয়াৰ উভিযোগ আছে বিধায়ক খানৰ বিৰুদ্ধে। অৱশ্যে এই অভিযোগ নস্যাৎ কৰিছে বিধায়ক অমনাতুল্লাহ খানে।
অমনাতুল্লাহে এক্সত এটা ভিডিঅ’ শ্বেয়াৰ কৰি কয় যে মোক আৰু আপৰ নেতাসকলক হাৰাশাস্তি কৰিবলৈ যৎপৰোনাস্তি চেষ্টা অব্যাহত ৰাখিছে। সততাৰে ৰাইজৰ সেৱা কৰাটো অপৰাধ নেকি?
দিল্লীৰ মুখ্যমন্ত্ৰী কেজৰিৱাল জেলত, সত্যেন্দৰ জৈনো আছে জেলত আৰু এতিয়া তেওঁলোকৰ লক্ষ্য আমাৰ দলক নিঃশেষ কৰা, সেয়ে মোক গ্ৰেপ্তাৰ কৰিবলৈ আহিছে।
‘আমি ভাঙি নপৰো। আমি সেও নামানো আৰু ভয়ো নকৰো। আমি জেললৈ যাবলৈ সাজু। আমি আশা কৰো আদালতৰ পৰা ন্যায় পাম’, এইদৰে কয় বিধায়কগৰাকীয়ে।
বিধায়ক হোৱাৰ উপৰি অমনাতুল্লাহ দিল্লী ৱাকফ ব’ৰ্ডৰ অধ্যক্ষও আছিল। অমনাতুল্লাহৰ অধ্যক্ষ হিচাপে কাৰ্যনিৰ্বাহ কৰা সময়ছোৱাত এনে ৩২টা নিযুক্তি দিয়া হৈছিল, যাৰ সন্দৰ্ভত অভিযোগ উত্থাপন কৰা হৈছিল যে তেওঁ চৰকাৰী নিৰ্দেশনাক আওকাণ কৰি এই নিযুক্তিসমূহ প্ৰদান কৰিছিল। লগতে অমনাতুল্লাহৰ বিৰুদ্ধে ব’ৰ্ডৰ বহু সম্পত্তি অবৈধভাৱে ভাড়াত দিয়া বুলিও অভিযোগ আছে।
