শুকুৰবাৰে নিশা অযোধ্যা ঘাইপথৰ বিবিডি থানা এলেকাত সংঘটিত হৈছে এক ভয়ংকৰ দুৰ্ঘটনা। মালভৰ্তি এখন ডাম্পাৰে নিয়ন্ত্ৰণ হেৰুৱাই পথৰ কাষতে থকা এটা জুপুৰি মোহাৰি লৈ যায়। ফলত জুপুৰিটোত শুই থকা স্বামী-স্ত্ৰীকে ধৰি তেওঁলোকৰ দুই সন্তানৰ থিতাতে মৃত্যু হয়।
জানিব পৰা অনুসৰি, আঠ মাহৰ গৰ্ভৱতী আছিল মৃত মহিলাগৰাকী। ইফালে এই শিহৰণকাৰী দুৰ্ঘটনাটোত সৌভাগ্যক্ৰমে প্ৰাণ ৰক্ষা পৰে দম্পতীহালৰ সাত বছৰীয়া কন্যাৰ।
বাৰাবাংকিৰ জয়তপুৰ নিবাসী উমেশ (৩৫) এজন টাইলছ মিস্ত্ৰী আছিল। পত্নী নীলম (৩২), দুই পুত্ৰ ক্ৰমে গোলু (৪)আৰু ছানী (১৩) আৰু কন্যা বৈষ্ণৱীৰ সৈতে অযোধ্যা ঘাইপথৰ কাষৰ এটা জুপুৰীত বাস কৰিছিল।
যোৱা নিশা গোটেই পৰিয়ালটো জুপুৰিটোত শুই থকাৰ সময়তে নিশা প্ৰায় ১ বজাত এখন ডাম্পাৰে নিয়ন্ত্ৰণ হেৰুৱাই জুপুৰিটোত প্ৰৱেশ কৰে। উমেশ, নীলম, গোলু আৰু ছানীৰ এই দুৰ্ঘটনাত থিতাতে মৃত্যু হয়। দুৰ্ঘটনাটোত কেৱল বৈষ্ণৱীৰ প্ৰাণ ৰক্ষা পৰে।
তথ্য লাভ কৰি আৰক্ষীয়ে সেই স্থানত উপস্থিত হৈ মৃতদেহকেইটা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। আৰক্ষীয়ে ইতিমধ্যে ডাম্পাৰ চালকক গ্ৰেপ্তাৰ কৰা বুলি জানিব পৰা গৈছে।
ঘটানা সন্দৰ্ভত পৰিয়ালটোৰ এগৰাকী আত্মীয়ই আৰক্ষী থানাত এফআইআৰ দাখিল কৰিছে।
