জুলাই মাহত একেৰাহে চতুৰ্থ দিনৰ বাবে ব্যৱসায়িক ক্ষেত্ৰত হৈছে অভূতপূৰ্ব উত্থান। ছেনচেক্স আৰু নিফটি উপনীত হৈছে এক নতুন স্তৰত।
উল্লেখ্য যে, বিনিয়োগকাৰীসকলে বৃহস্পতিবাৰে মাত্ৰ ৪৫ মিনিটৰ ব্যৱসায়িক অধিবেশনত ২.৭১ লাখ কোটি টকা উৰ্পাজন কৰে। বিশেষ কথাটো হ’ল যে জুলাই মাহত দেশৰ ১৮ কোটি বিনিয়োগকাৰীয়ে প্ৰায় ৯ লাখ কোটি টকা উৰ্পাজন কৰিবলৈ সক্ষম হয়।
ব’ম্বে ষ্টক একচেঞ্জৰ ফ্লেগশ্বিপ সূচক ছেনচেক্স ৪০৫.৮৪ পইণ্ট বৃদ্ধি হৈ ৮০,৩৯২.৬৪ পইণ্টৰ অভিলেখ স্তৰত উপনীত হয়। য’ত বৃহস্পতিবাৰে, ছেনচেক্স মুকলি হয় ৮০,৩২১.৭৯ পইণ্টত।
আনহাতে, নেচনেল ষ্ট’ক একচেঞ্জৰ মুখ্য সূচক নিফটিয়েও ব্যৱসায়িক অধিবেশনৰ ক্ষেত্ৰত এক নতুন অভিলেখ গঢ়ি তোলে। তথ্য অনুসৰি, নিফটিৰ ১১৪.৫ পইণ্ট বৃদ্ধি হৈ ২৪,৪০১ পইণ্টত উপনীত হয়। অৱশ্যে বৃহস্পতিবাৰে নিফটি মুকলি হয় ২৪,৩৬৯.৯৫ পইণ্টৰ সৈতে। বৰ্তমান নিফটিয়ে ৩৬ পইণ্টৰ সৈতে ২৪,৩২২.০৫ পইণ্টত ব্যৱসায় কৰি আছে।
বৃহস্পতিবাৰে, ছেনচেক্সত তালিকাভুক্ত ব্যৱসায়িক প্ৰতিষ্ঠানবোৰৰ ভিতৰত টাটা মটৰ্ছ, আইচিআইচিআই বেংক, মহিন্দ্ৰা এণ্ড মহিন্দ্ৰা, ইনফ’চিচ, এচচিএল টেকনল’জিজ আৰু টাটা কনচালটেন্সি চাৰ্ভিচেচ আদিয়ে হৈছে আটাইতকৈ বেছি লাভৱান।
আনহাতে, এইচডিএফচি বেংক, ইণ্ডাছাইণ্ড বেংক, আদানি পোৰ্টছ এণ্ড স্পেচিয়েল ইকনমিক জ’ন তথা ভাৰতীয় এয়াৰটেলৰ শ্বেয়াৰ পাইছে হ্ৰাস।
বিশেষজ্ঞসকলৰ মতে অনাগত দিনবোৰত তথ্য- প্ৰযুক্তি আৰু বেংকিং স্তক আৰু বৃদ্ধি পাব। আনহাতে বিদেশী বিনিয়োগকাৰী সকলেও বৃহস্পতিবাৰে শ্বেয়াৰ বজাৰত লাভান্বিত হয়।
