কংগ্ৰেছ সাংসদ তথা লোকসভাৰ বিৰোধী দলৰ নেতা ৰাহুল গান্ধীয়ে কয় যে চীনা সৈন্যসকলে প্ৰশিক্ষণৰ বাবে লাভ কৰে ৫ বছৰৰ সময়। একে সময়তে, ভাৰতীয় অগ্নিবীৰসকলে প্ৰশিক্ষণৰ বাবে লাভ কৰে মাত্ৰ ৬ মাহৰ সময়। যাৰ বাবে আজিও ভাৰতীয় অগ্নিবীৰসকল চীনা সৈন্যৰ তুলনাত পিছপৰি ৰৈছে বহুখিনি ক্ষেত্ৰত।
জানো আঁহক চীনা সেনাৰ নিযুক্তিৰ আৰু প্ৰশিক্ষণৰ বাবে থকা নিয়মবোৰ-
প্ৰকৃততে, চুবুৰীয়া দেশখনৰ প্ৰতিজন যুৱক-যুৱতীৰ বাবে সামৰিক সেৱা বাধ্যতামূলক। সামৰিক সেৱাৰ অধীনত ২ বছৰৰ বাবে যোগদান কৰিবলগীয়া হয় সেনাত। প্ৰথমে তেওঁলোকক দিয়া হয় তিনি মাহৰ প্ৰশিক্ষণ। কিন্তু পাছলৈ ইয়াৰ পৰিসৰ বৃদ্ধি কৰা হয় ৬ মাহলৈ। তাৰ পাছত তেঁওলোক নিজ নিজ ৰেজিমেণ্টলৈ যোৱাৰ পাছত পৃথকে প্ৰশিক্ষণ দিয়া হয়।
২ নিযুততকৈও অধিক সৈনিকৰ সৈতে, চীনৰ পিপল্ছ লিবাৰেচন আৰ্মী (পিএলএ) হৈছে বিশ্বৰ সৰ্ববৃহত সেনা। দৰাচলতে, চীনা সেনাত নিযুক্তি প্ৰক্ৰিয়া চীনৰ সামৰিক সেৱা আইনৰ অধীনত আহে। ইয়াত দেশৰ অধিকসংখ্যক যুৱক-যুৱতীয়ে দেশৰ সেৱাৰ নামত সেনাবাহিনীত যোগদান কৰিবলৈ অনুপ্ৰাণিত হয়। ইয়াৰ আগতে, চীনা সৈন্যত নিযুক্তি প্ৰাপ্ত সৈনিকসকলক দিয়া হৈছিল তিনিমাহৰ প্ৰশিক্ষণ। পাছলৈ চীনে নিজৰ সামৰ্থ্য বৃদ্ধিৰ বাবে নতুন নিযুক্তিৰ প্ৰশিক্ষণৰ সময় তিনিমাহৰ পৰা ছয়মাহলৈ বৃদ্ধি কৰিছে। যদি কোনো সৈনিক নিয়োগ কৰা হয়, তেঁওক ছয় মাহৰ পেছাদাৰী প্ৰশিক্ষণ দিয়া হয়।
চীনা বিষয়াসকলৰ মতে, নতুন নিযুক্তিৰ বাবে প্ৰশিক্ষণ হৈছে অতি কঠোৰ। সম্পূৰ্ণ প্ৰশিক্ষণ দিয়াৰ পাছতহে নতুন লোকসকলক অন্তৰ্ভুক্ত কৰা হয় সেনাবাহিনীত। সৈনিকসকলৰ প্ৰয়োজনীয়তা অনুসৰি তেঁওলোকৰ বাবে ৰখা হয় পৃথক প্ৰশিক্ষণ প্ৰণালী।
২০১৩ চনৰ পৰা, গ্ৰীষ্ম আৰু বসন্তকালত চীনা সেনাত আৰম্ভ হয় নামভৰ্তি। আগতে, তেঁওলোকৰ নামভৰ্তি শীতকালত। এই পৰিবৰ্তনৰ পাছতেই নতুন নিযুক্তিপ্ৰাপ্তসকলে পিএলএ-ত যোগদানৰ বাবে পাই সুযোগ।
দৰাচলতে, চীনৰ সামৰিক সেৱা আইন অনুসৰি, সামৰিক প্ৰশিক্ষকসকলৰ দ্বাৰা প্ৰশিক্ষণ প্ৰাথমিক আৰু মধ্য বিদ্যালয়ৰ পৰাই আৰম্ভ হয়। সশস্ত্ৰ বাহিনীয়ে সাংস্কৃতিক কাৰ্যসূচী আৰু প্ৰতিষ্ঠানৰ জৰিয়তে প্ৰদান কৰে প্ৰশিক্ষণ।
ইয়াৰ উপৰি সামৰিক শিক্ষাৰ বাবে পিএলএ-ৰ দ্বাৰা বহুতো প্ৰতিষ্ঠান হয় পৰিচালিত। ইয়াৰ ভিতৰত আছে সামৰিক বিজ্ঞান একাডেমী, ৰাষ্ট্ৰীয় প্ৰতিৰক্ষা বিশ্ববিদ্যালয় আৰু ৰাষ্ট্ৰীয় প্ৰতিৰক্ষা নিযুক্তি বিশ্ববিদ্যালয়।
