পঞ্জাৱৰ মুখ্যমন্ত্ৰী ভগৱন্ত মানে বুধবাৰে জলন্ধৰ পশ্চিম সমষ্টিত হ’বলগীয়া উপ-নিৰ্বাচনৰ বাবে এখন বিশাল ৰোড শ্ব’ত অংশ লয়। আপৰ প্ৰাৰ্থী মহেন্দ্ৰ ভগতৰ হৈ প্ৰচাৰ কাৰ্যসূচীত অংশ লৈ মুখ্যমন্ত্ৰীগৰাকীয়ে বিৰোধীক তীব্ৰ সমালোচনা কৰে।
বিশাল জনসভা সম্বোধন কৰি মুখ্যমন্ত্ৰী ভগৱন্ত মানে প্ৰতিশ্ৰুতি প্ৰদান কৰে যে ভগত জয়ী হ’লে তেওঁক মন্ত্ৰী পদ প্ৰদান কৰা হ’ব।
নাকোদাৰ চক মেইন ৰোডৰ ৩৩ নং অৱতাৰ নগৰ ৱাৰ্ডত অনুষ্ঠিত হোৱা ৰোড শ্ব’ৰ সময়ত মানে দাবী কৰে যে আন দলৰ প্ৰাৰ্থীসকলে স্বীকৃতিৰ বাবে হাহাকাৰ কৰিছে।
তেওঁ লগতে মন্তব্য কৰে যে বিৰোধী নেতাসকলে দিন কাল চাইহে বাহিৰলৈ ওলাই যায়।
বিৰোধীয়ে উত্থাপন কৰা দুৰ্নীতিৰ অভিযোগ সন্দৰ্ভত মন্তব্য কৰি মুখ্যমন্ত্ৰী ভগৱন্ত মানে কয়, ‘যদি মই টকা উপাৰ্জন কৰিবলগীয়া হয় তেন্তে মই ৰাজনীতিত প্ৰৱেশ নকৰিলোহেঁতেন। পূৰ্বতে মই এটা কমেডী শ্ব’ৰ পৰা ৭০ লাখ টকা উপাৰ্জন কৰিছিলো।’
তেওঁ দৃঢ়তাৰে কয় যে তেওঁৰ বিৰুদ্ধে কোনো দুৰ্নীতিৰ অভিযোগ উত্থাপন কৰিব নোৱাৰে আৰু তেওঁ জনসাধাৰণৰ সেৱাৰ বাবে সদায় উৎসৰ্গিত।
