এইবাৰ ধুবুৰীৰ ৰাইজে সসন্মানেৰে বিদায় দিলে আজমলক। আজমলক প্ৰত্যুত্তৰ দিবলৈ যেন বহু বছৰ অপেক্ষা কৰি আছিল ধুবুৰীবাসীয়ে। ধনে ধানে শক্তিশালী আজমলক ঐতিহাসিক ধুবুৰীৰ পৰা বিদায় দিবলৈ এইবাৰ পণ বান্ধি লৈছিল জনতাই। গাঁৱে-চৰে ক্ষোভৰ অগনি জ্বলিছিল আজমলৰ বিৰুদ্ধে।
চামগুৰিৰ পৰা ধুবুৰীলৈ গৈ ধুবুৰীক জনতাৰ উন্নয়নৰ বাবে দায়িত্ব লোৱা ৰকিবুল হুছেইন নামি পৰিছিল আজমলৰ বিৰুদ্ধে। পাৰ হৈ যোৱা বছৰবোৰত ধুবুৰীৰ বাবে একোৱেই নকৰিলে আজমলে। নেশ্যন এন ইয়ে চৰজমিন সমীক্ষা চলাই ধুবুৰীৰ জনতাৰ ক্ষোভৰ কথা জানিব পাৰিছিল। আজমল যে এইবাৰ কোনো কাৰণেতেই নাহে তাৰ বাবে বদ্ধ পৰিকৰ হৈ পৰিছিল ধুবুৰীৰ জনতা। ধুবুৰীৰ ভৌগলিক জ্ঞান আৰু ভাষিক বিবৰ্ণতাৰ মাজতো ৰকিবুল হুছেইনে গালে সফলতাৰ জয়গান। ধুবুৰীৰ জনতাৰ বাবে এইবাৰ ৰকিবুল হুছেইনে কি কৰে সেয়া লক্ষণীয় হ’ব।
চৰ অঞ্চলৰ উন্নয়নৰ নামত অনুষ্ঠিত কৰা সভাত কেৱল জাৰি দিয়া পানী দি ৰাইজক প্ৰলোভন দিয়া আজমলৰ যাদু নচলিল। চৰ অঞ্চলৰ লগতে গাঁৱৰ জনতাক অন্ধবিশ্বাসৰ দিশে লৈ যোৱা আজমলৰ কৌশল হয়তো বুজি উঠিছিল ধুবুৰীৰ জনতাই। সেয়ে এই নিৰ্বাচনত আজমলক উচিত প্ৰত্যুত্তৰ দি ৰকিবুলক ধুবুৰীৰ দায়িত্ব দিলে জনতাই। এতিয়াৰে পৰা কংগ্ৰেছ মিত্ৰজোঁটৰ অতি গুৰুত্বপূৰ্ণ দায়িত্বত থাকিব ধুবুৰী।
