চেন্নাইৰ এম চিদাম্বৰম ষ্টেডিয়ামত দক্ষিণ আফ্ৰিকাৰ বিৰুদ্ধে অনুষ্ঠিত হোৱা একমাত্ৰ টেষ্ট মেচখনত ভাৰতীয় মহিলা দলটোৱে দক্ষিণ আফ্ৰিকাৰ মহিলা দলটোক ১০ উইকেটত পৰাস্ত কৰে। মেচখনত ভাৰতীয় দলৰ সোঁহতীয়া অফস্পিনাৰ স্নেহ ৰানাই চমকপ্ৰদ বলিং প্ৰদৰ্শনেৰে ১০টা উইকেট লাভ কৰে। স্নেহ ৰানাই লাভ কৰে মেচখনৰ শ্ৰেষ্ঠ খেলুৱৈৰ সন্মান।
হৰমনপ্ৰীত কৌৰ নেতৃত্বাধীন ভাৰতীয় মহিলা দলটোৱে নিজৰ প্ৰথম ইনিংছত ৬ উইকেটৰ বিনিময়ত ৬০৩ ৰান সংগ্ৰহ কৰি ইনিংছ ঘোষণা কৰে। প্ৰথম ইনিংছত অপেনাৰ শ্বেফালী বাৰ্মাই ২০৫ ৰানৰ ঐতিহাসিক ইনিংছ খেলে। সোঁহতীয়া আক্ৰমক বেটাৰগৰাকীয়ে মাত্ৰ ১৯৭টা বলতেই এই অভিলেখ গঢ়ে।
আনহাতে আনগৰাকী অপেনাৰ স্মৃতি মান্ধানাইও প্ৰথম ইনিংছত ১৬১টা বলত ১৪৯ ৰানৰ ইনিংছ খেলিছিল। ভাৰতীয় দলৰ বিশাল স্ক’ৰৰ প্ৰত্তুৰত দক্ষিণ আফ্ৰিকা দলটোৱে প্ৰথম ইনিংছত মাত্ৰ ২৬৬ ৰানহে সংগ্ৰহ কৰিবলৈ সক্ষম হয়। ভাৰতৰ হৈ স্নেহ ৰানাই ৭৭ ৰান দি ৮টা উইকেট লাভ কৰে।
ফল’অনৰ সন্মুখীন হোৱা দক্ষিণ আফ্ৰিকাৰ দলটোৱে নিজৰ দ্বিতীয় ইনিংছত ৩৭৩ ৰান সংগ্ৰহ কৰে। দক্ষিণ আফ্ৰিকাৰ অধিনায়ক লোৰাই দ্বিতীয় ইনিংছত ১২২ ৰানৰ ইনিংছ খেলে। তেওঁৰ উপৰি সুনে লুছেইও ১০৯ ৰানৰ শতকীয় ইনিংছ খেলি দলটোক কিছু সন্মানজনক স্ক’ৰলৈ লৈ যাবলৈ সক্ষম হয়।
দ্বিতীয় ইনিংছত স্নেহ ৰানাই দুটা উইকেট লাভ কৰিবলৈ সক্ষম হয়। মেচখনত তেওঁ মুঠ ১০টা উইকেট লাভ কৰে।
দক্ষিণ আফ্ৰিকাই দ্বিতীয় ইনিংছ সামৰাৰ পিছত মেচখন জয়ী হ’বলৈ ভাৰতীয় দলটোক প্ৰয়োজন হয় মাত্ৰ ৩৭ ৰানৰ। ভাৰতে কোনো উইকেট নেহেৰুৱাকৈয়ে এই সহজ জয়ৰ লক্ষ্যত উপনীত হয়। এই মেচখন আছিল ভাৰতীয় মহিলা দলৰ একেৰাহে তৃতীয়টো টেষ্ট বিজয়।
ভাৰতে এই তিনিওখন টেষ্ট হৰমনপ্ৰীত কৌৰৰ অধিনায়কত্বত জয়লাভ কৰিছে। এই কৃতিত্ব গঢ়া হৰমনপ্ৰীত প্ৰথমগৰাকী মহিলা অধিনায়ক। ভাৰতৰ সফল মহিলা টেষ্ট অধিনায়কৰ ক্ষেত্ৰত এতিয়া মিতালী ৰাজক স্পৰ্শ কৰিছে হৰমনপ্ৰীতে। মিতালী ৰাজেও অধিনায়ক হিচাপে তিনিখন টেষ্টত জয়লাভ কৰিছিল।
