ভাৰতীয় বেংকৰ পৰা হাজাৰ-হাজাৰ কোটি টকাৰ ঋণ লৈ দেশ এৰি পলায়ন কৰা বি চি চি আইৰ প্ৰাক্তন অধ্যক্ষ তথা আই পি এলৰ প্ৰতিষ্ঠাপক ললিত মোদীয়ে ভানুআটুৰ নাগৰিকত্ব লাভ কৰিছে। তেওঁৰ আইনী উপদেষ্টা মেহবুব আবদীয়ে এই খবৰ নিশ্চিত কৰিছে।
ললিত মোদীয়ে ভাৰতৰ পৰা পলায়ন কৰি ২০১০ চনত লণ্ডনলৈ গৈছিল। ভাৰতত ললিত মোদীৰ বিৰুদ্ধে দুৰ্নীতিৰ গুৰুতৰ অভিযোগ উত্থাপন হৈছে। এতিয়া ললিত মোদীয়ে ভানুআটুৰ নাগৰিকত্ব লোৱাৰ পিছত তেওঁক ভাৰতলৈ ঘূৰাই অনাটো কঠিন হ’ব।
ললিত মোদীৰ আইনী উপদেষ্টা মেহবুব আবদীয়ে কয় যে ভানুআটুৰ নাগৰিকত্ব লাভ কৰাৰ পিছত ললিত মোদীয়ে এতিয়া ভাৰতীয় পাছপ’ৰ্ট জমা দিয়াৰ প্ৰক্ৰিয়াত আছে। ভাৰতীয় পাছপ’ৰ্ট জমা দিয়াৰ নিৰ্ধাৰিত পদ্ধতি অনুসৰি ললিত মোদীয়ে সকলো প্ৰয়োজনীয় পদক্ষেপ গ্ৰহণ কৰিছে।
এই সন্দৰ্ভত বৈদেশিক মন্ত্ৰালয়ৰ মুখপাত্ৰ ৰণধীৰ জয়ছৱালে কয়, ‘ললিত মোদীয়ে লণ্ডনত থকা ভাৰতীয় উচ্চায়ুক্তত পাছপ’ৰ্ট জমা দিবলৈ আবেদন কৰিছে। বৰ্তমানৰ নিয়ম আৰু পদ্ধতি অনুসৰি পৰীক্ষা কৰা হ’ব। লগতে আমাক জনোৱা হৈছে যে তেওঁ ভানুআটুৰ নাগৰিকত্ব লাভ কৰিছে। আমি তেওঁৰ বিৰুদ্ধে আইন অনুসৰি গোচৰ চলাই আছো।’
ভানুআটু, কেনেদৰে লাভ কৰে নাগৰিকত্ব
ভানুআটু দক্ষিণ প্ৰশান্ত মহাসাগৰীয় দ্বীপ দেশ। প্ৰতিবেদন অনুসৰি এই দেশৰ জনসংখ্যা মাত্ৰ ৩ লাখ। ইয়াত বিনিয়োগ কাৰ্যসূচীৰ জৰিয়তে নাগৰিকত্ব লাভ কৰা হয়। কেপিটেল ইনভেষ্টমেণ্ট ইমিগ্ৰেচন প্লেন অনুসৰি ১৫৫,০০০ (১.৩ কোটি টকা) মাৰ্কিন ডলাৰ বিনিয়োগ কৰিলেই ভানুআটুৰ নাগৰিকত্ব লাভ কৰিব পাৰি।
১৯৮০ চনলৈকে ভানুআটু ফ্ৰান্স আৰু ব্ৰিটেইনৰ দখলত আছিল
১৯৮০ চনলৈকে ই ফ্ৰান্স আৰু ব্ৰিটেইনৰ দখলত আছিল। কিন্তু এতিয়া স্বাধীন জাতি।
