গুজৰাটৰ আহমেদাবাত সংঘটিত হোৱা বিমান দুৰ্ঘটনা সন্দৰ্ভত আহিছে ডাঙৰ খবৰ। আজি দুপৰীয়া সংঘটিত এই ভয়ংকৰ দুৰ্ঘটনাটোৰ ফলত বিমানখনত থকা আটাইকেইগৰাকী লোকৰে মৃত্যু হোৱাৰ খবৰ আহিছে। আটাইতকৈ দুৰ্ভাগ্যজনক কথা এয়াই যে দুৰ্ঘটনাটোত গুজৰাটৰ প্ৰাক্তন মুখ্যমন্ত্ৰী বিজয় ৰূপানীৰো মৃত্যু হৈছে।
এয়াৰ ইণ্ডিয়াৰ ১৭১ বিমানখনত আছিল মুঠ ২৪২ গৰাকী লোক। দুৰ্ঘটনাত পতিত হোৱা বিমানখনত আছিল ১৬৯ গৰাকী ভাৰতীয় যাত্ৰী। ইয়াৰ উপৰি ৫৩ গৰাকী ব্ৰিটিছ, এজন কানাডাৰ আৰু ৭জন পৰ্তুগালৰ যাত্ৰীৰ লগতে দুগৰাকী পাইলট আৰু ১০ গৰাকী কেবিন ক্ৰু মেম্বাৰ আছিল।
শেহতীয়াকৈ কেইবাটাও ৰাষ্ট্ৰীয় সংবাদ মাধ্যমে প্ৰকাশ কৰা বাতৰি অনুসৰি বিমানখনত আটাইকেইজন যাত্ৰীৰ উপৰি দুৰ্ঘটনা সংঘটিত হোৱা অঞ্চলটোৰ একাংশ স্থানীয় লোকৰো মৃত্যু হোৱাৰ সন্দেহ প্ৰকাশ কৰা হৈছে।
ইয়াৰ উপৰি বিমানখনে খুন্দা মৰা চিকিসকৰ হোষ্টেলৰ একাংশ লোকো এই ভয়ংকৰ বিমান দুৰ্ঘটনাত প্ৰাণ হেৰুওৱা বুলি আশংকা কৰা হৈছে।
উল্লেখ্য যে, আজি দুপৰীয়া ১.৩৮ বজাত গুজৰাটৰ আহমেদাবাদৰ পৰা লণ্ডনলৈ উৰা মৰাৰ ঠিক কিছু সময়ৰ পিছতেই এযাৰ ইণ্ডিয়াৰ বিমানখন দুৰ্ঘটনাত পতিত হৈছিল।
