গোৱালপাৰাৰ পাইকান সংৰক্ষিত বনাঞ্চলৰ এহাজাৰ ভূমি খালী কৰাৰ উদ্দেশ্যে শনিবাৰে প্ৰশাসনে চলাবলগীয়া উচ্ছেদ অভিযানৰ পূৰ্বেই সেই স্থানৰ পৰা প্ৰায় ৯৫ শতাংশ লোকে ঘৰ-বাৰী এৰি যোৱা বুলি জানিব পৰা গৈছে। শুকুৰবাৰে এই তথ্য প্ৰদান কৰে জিলা প্ৰশাসনে।
গোৱালপাৰাৰ উপায়ুক্ত খনিন্দ্ৰ চৌধুৰীয়ে কয় যে দখল বিৰোধী অভিযান সুচাৰুৰূপে চলাৰ বাবে বন বিভাগক সহায় কৰিবলৈ জিলা প্ৰশাসন সম্পূৰ্ণৰূপে সাজু।
তেওঁ লগতে কয়, ‘প্ৰায় ৯০–৯৫ শতাংশ লোক ইতিমধ্যে ঘৰ খালী কৰি গুচি গৈছে, তেওঁলোকৰ অস্থায়ী ঘৰ-বাৰী ভাঙি সামগ্ৰীসমূহ লৈ গৈছে। কেৱল স্থায়ী বা ইটাৰে নিৰ্মিত ঘৰ বা সম্পত্তিহে আছে সেই স্থানত।’
ধুবুৰীৰ চাপৰত চলোৱা উচ্ছেদ অভিযানৰ পিছত ১১ জুলাই অৰ্থাত শুকুৰবাৰে গোৱালপাৰাৰ পাইকান সংৰক্ষিত বনাঞ্চলৰ দখলীকৃত ১০০০ বিঘা ভূমি দখলমুক্ত কৰিবলৈ উচ্ছেদ অভিযান চলোৱাৰ কথা আছিল। শুকুৰবাৰৰ দিনটো ইছলাম ধৰ্মাৱলম্বী লোকৰ জুম্মা নামাজ হোৱা বাবে চৰকাৰে এই উচ্ছেদ অভিযানৰ সময়সীমা এদিন পিছুৱাই ১২ জুলাইৰ দিনটো নিৰ্ধৰাণ কৰিছে।
উল্লেখ্য যে, গোৱালপাৰাৰ সংমণ্ডল বন বিষয়া (ডি এফ অ’) তেজস মাৰিস্বামীয়ে উল্লেখ কৰে যে এই অভিযানে কৃষ্ণাই বনাঞ্চলৰ অন্তৰ্গত পাইকান সংৰক্ষিত বনাঞ্চলৰ প্ৰায় ১,০৪০ বিঘা মাটিত উচ্ছেদ চলোৱা হ’ব।
