ছানৰাইজাৰ্ছ হায়দৰাবাদৰ অপেনাৰ বেটাৰ অভিষেক শৰ্মাই পুনৰ এবাৰ নিজৰ দৰ্শনীয় ইনিংছৰ জৰিয়তে হৃদয় জিনিবলৈ সক্ষম হৈছে অনুৰাগীৰ। সোমবাৰে লক্ষ্ণৌ ছুপাৰ জায়েণ্টছৰ বিৰুদ্ধে অনুষ্ঠিত মেচখনত অভিষেক শৰ্মাই ৪টা চাৰি আৰু ৬টা ছয়ৰ সহায়ত ২০ টা বলত ৫৯ ৰানৰ বিস্ফোৰক ইনিংছ খেলে। অভিষেক শৰ্মাৰ এই ইনিংছটোৰ সহায়তেই ছানৰাইজাৰ্ছ হায়দৰাবাদে লক্ষ্ণৌ ছুপাৰ জায়েণ্টছক ৬ উইকেটত পৰাস্ত কৰিবলৈ সক্ষম হয়।
সোমবাৰে খেলা এই ইনিংছটোৰ জৰিয়তে অভিষেক শৰ্মাই কেইবাটাও অভিলেখ গঢ়িবলৈ সক্ষম হয়। আই পি এল ইতিহাসত ২০টাতকৈও কম বলত সৰ্বাধিকবাৰ অৰ্ধশতক অৰ্জন কৰা ভাৰতীয় ক্ৰিকেটাৰত পৰিণত হ’ল অভিষেক শৰ্মা। এই পৰ্যন্ত ২০টাতকৈ কম বলত তেওঁ মুঠ চাৰিটা অৰ্ধশতক অৰ্জন কৰিছে।
অভিষেকৰ পূৰ্বে কোনো ভাৰতীয়ই আই পি এলত এনে কৃতিত্ব অৰ্জন কৰা নাছিল। অভিষেক শৰ্মাই ২০২৪ চনত মুম্বাই ইণ্ডিয়ানছৰ বিৰুদ্ধে ১৬টা বলত, ২০২৫ চনত লক্ষ্ণৌৰ বিৰুদ্ধে ১৮টা আৰু ১৯টা বলত (২০২৪ চনত) আৰু ২০২৫ চনত পঞ্জাব কিংছৰ বিৰুদ্ধে ১৯টা বলত অৰ্ধশতক অৰ্জন কৰিবলৈ সক্ষম হৈছিল।
ইয়াৰ উপৰি ২০২৪ চনৰ পৰা এতিয়ালৈকে আই পি এলত সৰ্বাধিক ছয় কোবোৱা বেটছমেনতো পৰিগণিত হৈছে অভিষেক শৰ্মা। ২০২৪ চনৰ পৰা এতিয়ালৈকে অভিষেকে আই পি এলত ২৭টা ইনিংছ খেলি মুঠ ৬৫টা ছয় কোবাইছে।
আই পি এলত ২০২৪ চনৰ পৰা ভাৰতীয় বেটছমেনৰ সৰ্বাধিক ছয়
৬৫* – অভিষেক শৰ্মা (২৭ ইনিংছ)
৬০ – ৰিয়ান পৰাগ (২৭ ইনিংছ)
৬০ – বিৰাট কোহলী (২৬ ইনিংছ)
৪৫ – শিৱম ডুবে (২৬ ইনিংছ)
৪৫ – প্ৰভসিমৰন সিং (২৩ ইনিংছ)
আনহাতে অভিষেক শৰ্মাৰ নামত সংযোজন হৈছে আন এক অভিলেখ। আই পি এলত টাৰ্গেটৰ পিছা কৰি ২০০ৰো অধিক ষ্ট্ৰাইক ৰেটেৰে সৰ্বাধিক ৰান সংগ্ৰহ কৰা বেটছমেন হিচাপে পৰিগণিত হৈছে অভিষেক। টাৰ্গেট চেজ কৰাৰ ক্ষেত্ৰত অভিষেকে এতিয়ালৈকে ২০০ৰো অধিক ষ্ট্ৰাইক ৰেটত ৫৭৩ ৰান সংগ্ৰহ কৰিবলৈ সক্ষম হৈছে। তেওঁৰ পিছত আছে সূৰ্য্যকুমাৰ যাদৱ, যিয়ে টাৰ্গেট চেজ কৰাৰ সময়ত ২০০ৰো অধিক ষ্ট্ৰাইক ৰেটৰ সহায়ত ৫৬৪ ৰান সংগ্ৰহ কৰাৰ অভিলেখ গঢ়িছে।
আই পি এলত ২০০ৰো অধিক ষ্ট্ৰাইক ৰেটৰ সহায়ত টাৰ্গেট চেজ কৰি সৰ্বাধিক ৰান সংগ্ৰহ কৰা বেটাৰ
৫৭৩*-অভিষেক শৰ্মা
৫৬৪- সূৰ্য্যকুমাৰ যাদৱ
৫৩৮ – নীতিশ ৰাণা
৫২০ – বিৰাট কোহলী
৫১৯ – সঞ্জু ছেমচন
৫০৮ – ফাফ ডু প্লেছিছ
উল্লেখ্য যে, সোমবাৰৰ মেচখনত লক্ষ্ণৌ ছুপাৰ জায়েণ্টছ দলে প্ৰথমে বেট ধৰি নিৰ্ধাৰিত ২০ অভাৰত ৭টা উইকেট হেৰুৱাই ২০৫ ৰান সংগ্ৰহ কৰিছিল। ইয়াৰ প্ৰত্যুত্তৰত ছানৰাইজাৰ্ছে ১৮.২ অভাৰতে ২০৬ ৰানৰ লক্ষ্যত উপনীত হৈ সহয় বিজয় সাব্যস্ত কৰে। মেচখনত বিস্ফোৰক ইনিংছ খেলা অভিষেক শৰ্মাক প্লেয়াৰ অৱ দ্যা মেচৰ সন্মানেৰে সন্মানিত কৰা হয়।
