মছজিদত লাউডস্পীকাৰ স্থাপনৰ অনুমতি দিবলৈ ৰাজ্য কৰ্তৃপক্ষৰ নিৰ্দেশ বিচৰা আবেদন খাৰিজ কৰিছে এলাহাবাদ উচ্চ ন্যায়ালয়ে।
পিলিভীত জিলাৰ মুখতিয়াৰ আহমেদৰ আবেদন খাৰিজ কৰি ন্যায়াধীশ অশ্বনী কুমাৰ মিশ্ৰ আৰু ন্যায়াধীশ ডি ৰমেশৰ বিচাৰপীঠে কয় যে, ধৰ্মীয় স্থানত প্ৰাৰ্থনাৰ বাবে লাউডস্পীকাৰৰ ব্যৱহাৰক অধিকাৰ হিচাপে দাবী কৰিব নোৱাৰি।
বিশেষকৈ ধৰ্মীয় স্থানত যেতিয়া লাউডস্পীকাৰ ব্যৱহাৰ কৰা হয়, প্ৰায়ে তাৰ ওচৰ-পাঁজৰে থকাসকলৰ বাবে ই বাধাৰ সৃষ্টি কৰে।
শুনানিৰ সময়ত ৰাজ্য চৰকাৰৰ অধিবক্তাই ৰিট আবেদনখনৰ ৰক্ষণাবেক্ষণ যোগ্যতাৰ ওপৰত আপত্তি জনাই কয় যে, আবেদনকাৰী মছজিদৰ মুতাৱাল্লী (যত্ন লোৱা লোক) নহয়, লগতে সেই মছজিদৰ সৈতেও তেওঁ জড়িতও নহয়।
ৰাজ্য চৰকাৰৰ অধিবক্তাৰ যুক্তিৰ বিষয়বস্তু বিচাৰি আদালতে কয় যে, আবেদনকাৰীৰ এই আবেদন দাখিল কৰাৰ কোনো অধিকাৰ নাই।
ইয়াৰ পূৰ্বে ২০২২ চনৰ মে’ মাহত এলাহাবাদ উচ্চ ন্যায়ালয়ে এক ৰায়দানত দিছিল যে, আইনত এই ব্যৱস্থা কৰা হৈছে যে মছজিদৰ পৰা লাউডস্পীকাৰ বজোৱাটো কোনো মৌলিক অধিকাৰ নহয়।
কিন্তু ২০২৩ চনৰ নৱেম্বৰ মাহত গুজৰাট উচ্চ ন্যায়ালয়ে ৰায়দান দিয়ে যে, মছজিদত আজানৰ বাবে লাউডস্পীকাৰ ব্যৱহাৰ কৰিলে শব্দ প্ৰদূষণ নহয়। লগতে ইয়াৰ ব্যৱহাৰত নিষেধাজ্ঞা আৰোপ কৰা জনস্বাৰ্থৰ মামলা (পিআইএল) নাকচ কৰা হৈছিল।
