বুধিপৰাত সংঘটিত হৈছে ৰাজ্য কঁপাই যোৱা এক ভয়ংকৰ পথ দুৰ্ঘটনা। পুৱতি নিশা দুৰ্ঘটনাগ্ৰস্ত হয় ন-কইনাক আনিবলৈ যোৱা বৰযাত্ৰীৰ বাছ। ট্ৰাকৰ খুন্দাত চূৰ্ণ-বিচূৰ্ণ বাছখন। থিতাতে প্ৰাণ হেৰুৱায় দৰাৰ ককায়েক আৰু মোমায়েকে।
জানিব পৰা মতে, ৰাষ্ট্ৰীয় ঘাইপথৰ কাষত ৰৈ থকা অৱস্থাত পিছফালৰ পৰা আহি এখন মালবাহী ট্ৰাকে আহি খুন্দা মাৰে বৰযাত্ৰীৰ বাহনখনত। মালবাহী ট্ৰাকৰ প্ৰচণ্ড খুন্দাত ছিটিকি পৰে বিবাহযাত্ৰী কঢ়িওৱা বাহনখন। প্ৰচণ্ড শব্দত কঁপি উঠে গোৱালপাৰা।
দুৰ্ঘটনাটোৰ ফলত থিতাতে নিহত হয় দৰাৰ ককায়েক ৰবি দাস আৰু মোমায়েক নৰেশ দাস। ইয়াৰ লগতে আহত হয় ১০ জনতকৈও অধিক লোক। আহতসকলক উদ্ধাৰ কৰি আৰক্ষীয়ে উন্নত চিকিৎসাৰ বাবে গোৱালপাৰা নিধনুৰাম ৰাজবংশী চিকিৎসালয়লৈ প্ৰেৰণ কৰে।
উক্ত ঘটনাৰ পিছতেই অঞ্চলটোত হাহাকাৰময় পৰিস্থিতিৰ সৃষ্টি হয়। শোকত ভাগি পৰে ভুক্তভোগী পৰিয়াল। এই ঘটনাৰ উচিত তদন্ত বিচাৰি প্ৰশাসনক আহ্বান জনাইছে পৰিয়ালৰ লোকে।
