কেন্দ্ৰীয় চৰকাৰৰ দৰে অসম চৰকাৰৰ কৰ্মচাৰীসকলৰো মৰগীয়া বানচ বৃদ্ধি পালে। এই কথা সদৰী কৰে মুখ্যমন্ত্রী হিমন্ত বিশ্ব শৰ্মাই। বিগত সপ্তাহত সামাজিক মাধ্যমযোগে মুখ্যমন্ত্রীয়ে কেন্দ্ৰীয় চৰকাৰে কৰ্মচাৰীসকলৰ বাবে মৰগীয়া বানচ ৩ শতাংশ বৃদ্ধি কৰা সন্দৰ্ভত প্ৰতিক্ৰিয়া ব্যক্ত কৰি অসম চৰকাৰৰ কৰ্মচাৰীসকলৰ বাবেও মৰগীয়া বানচ বৃদ্ধি কৰা হ’ব বুলি ঘোষণা কৰিছিল।
সেই ঘোষণা অনুসৰি আজি মুখ্যমন্ত্ৰী ড০ হিমন্ত বিশ্ব শৰ্মাৰ অধ্যক্ষতাত অনুষ্ঠিত হোৱা কেবিনেট বৈঠকত ৰাজ্য চৰকাৰৰ কৰ্মচাৰীসকলৰ বাবে মৰগীয়া বানচ ৩ শতাংশ বৃদ্ধি কৰাৰ সিদ্ধান্ত চূড়ান্ত কৰে।
কেবিনেট বৈঠকৰ অন্তত সম্বোধন কৰা সংবাদমেলত মুখ্যমন্ত্ৰী শৰ্মাই কয় যে চৰকাৰী কৰ্মচাৰীসকলে এই বৰ্ধিত ৩ শতাংশ মৰগীয়া বানচ ১ ডিচেম্বৰৰ দৰমহাত লাভ কৰিব। এই বৰ্ধিত বানচ জুলাই মাহৰ কৰা কাৰ্যকৰী কৰা হ’ব।
চাৰিমাহৰ বকেয়া চাৰিটা কিস্তিত প্ৰদান কৰা হ’ব বুলি মন্তব্য কৰি শৰ্মাই কয় যে ডিচেম্বৰ মাহত ২৫ শতাংশ, জানুৱাৰী মাহত ২৫ শতাংশ, ফেব্ৰুৱাৰি মাহত ২৫ শতাংশ আৰু মাৰ্চ মাহত বাকী থকা ২৫ শতাংশ লাভ কৰিব।
দীপাৱলীৰ পূৰ্বে ৰাজ্যিক কৰ্মচাৰীৰ বাবে এয়া সুখৰ সংবাদ বুলিও মন্তব্য কৰে মুখ্যমন্ত্ৰী শৰ্মাই।
