আজি বিয়লি উপ-ৰাজ্যপাল ভি কে ছাক্সেনাৰ সৈতে হ’বলগীয়া বৈঠকৰ পিছতে অৰবিন্দ কেজৰিৱালে মুখ্যমন্ত্ৰী পদৰ পৰা পদত্যাগ কৰিব। কেজৰিৱালৰ পদত্যাগৰ পিছতে মুখ্যমন্ত্ৰীৰ দায়িত্ব গ্ৰহণ কৰিব দিল্লীৰ মন্ত্ৰী আতিশী মাৰ্লেনাই। আজি আম আদমী পাৰ্টিৰ বিধায়িনী দলৰ বৈঠকত সৰ্বসন্মতিক্ৰমে এই সিদ্ধান্ত গ্ৰহণ কৰা হয়।
আজি আপৰ বিধায়কসকলৰ বৈঠকত দলৰ নেতা দিলীপ পাণ্ডেয়ে মুখ্যমন্ত্ৰীৰ পদৰ নাম ঠিৰাং কৰিবলৈ কেজৰিৱালক সিদ্ধান্ত ল’বলৈ প্ৰস্তাৱ আগবঢ়ায়। ইয়াৰ পিছতে আপৰ ৰাষ্ট্ৰীয় আহ্বায়ক কেজৰিৱালে আতিশীৰ নাম প্ৰস্তাৱ কৰে আৰু আপৰ সকলো বিধায়কে এই প্ৰস্তাৱ মানি লয় আৰু আতিশীক বিধায়িনী দলৰ নেত্ৰী নিৰ্বাচিত কৰা হয়।
উল্লেখ্য যে, দিল্লী চৰকাৰৰ শিক্ষাৰ লগতে আন কেইবাটাও গুৰুত্বপূৰ্ণ বিভাগৰ দায়িত্বত আছিল আতিশী।
দিল্লীৰ সুৰা নীতিৰ সৈতে জড়িত দুৰ্নীতিৰ গোচৰত গ্ৰেপ্তাৰ হোৱাৰ পিছতে ৪৩ বছৰীয়া কলকাজীৰ বিধায়ক আতিশী মন্ত্ৰী হৈছিল। যি সময়ত কেজৰিৱাল আৰু চিছ’দিয়া কাৰাগাৰত বন্দী হৈ আছিল তেতিয়া আতিশীয়ে দলীয় অনুষ্ঠান আৰু সংবাদ মাধ্যমৰ বিনিময়ত দলৰ স্থিতি স্পষ্ট কৰি দিছিল।
উল্লেখ্য যে, সুৰা কেলেংকাৰী গোচৰত জামিন লাভ কৰাৰ পিছতেই দিল্লীৰ মুখ্যমন্ত্ৰী অৰবিন্দ কেজৰিৱালে মুখ্যমন্ত্ৰী পদৰ পৰা পদত্যাগ কৰিব বুলি ঘোষণা কৰিছিল। সেই ঘোষণা অনুসৰি অৰবিন্দ কেজৰিৱালে আজি বিয়লি উপ-ৰাজ্যপালক সাক্ষাত কৰি পদত্যাগ পত্ৰ দাখিল কৰিব।
