বাংলাদেশৰ বাবে আজিৰ দিনটো হ’ব এক ঐতিহাসিক দিন। বিগত বৰ্ষত আগষ্ট মাহত প্ৰাক্তন প্ৰধানমন্ত্ৰী শ্বেখ হাছিনাৰ ক্ষমতা উৎখাত কৰাৰ পিছতেই বিদ্ৰোহৰ নেতৃত্ব দিয়া গোটটোৰ অন্যতম বিশিষ্ট ছাত্ৰ নেতা নাহিদ ইছলামে মহম্মদ ইউনুছৰ অন্তৱৰ্তীকালীন চৰকাৰৰ পৰা পদত্যাগ কৰিছে।প্ৰতিবাদৰ অন্তত বাংলাদেশৰ ছাত্ৰসমাজ নামি পৰিছে সক্ৰিয় ৰাজনীতিত।
এতিয়া তেওঁলোকে আজি অৰ্থাৎ ২৮ ফেব্ৰুৱাৰীত নতুন ৰাজনৈতিক দল এটা আৰম্ভ কৰিবলৈ আগবাঢ়িছে। এই নতুন দলটোৰ নাম হ’ব জাতীয় নাগৰিক পাৰ্টী। এই দলটোৰ আহ্বায়ক হ’ব নাহিদ ইছলাম। নাহিদ ইছলাম আছিল বাংলাদেশৰ অন্তৱৰ্তীকালীন চৰকাৰৰ প্ৰাক্তণ উপদেষ্টা
ছাত্ৰ গোটৰ মঞ্চ জাতীয় নাগৰিক সমিতিৰ মুখপাত্ৰ সমন্ত শ্বাৰমিনে কয় যে, ২০২৪ চনৰ জুলাইৰ বিদ্ৰোহৰ পিছত বাংলাদেশত নতুন আশা আৰু আকাংক্ষাৰ সৃষ্টি হৈছে। সেই আশা আৰু আকাংক্ষাৰ পৰিপ্ৰেক্ষিতত ছাত্ৰসমাজে নতুন ৰাজনৈতিক দল গঠনৰ বাবে লক্ষ্য কৰিছে।
বিদ্ৰোহৰ সময়ত তেওঁলোকে উপলব্ধি কৰিছিল যে, বাংলাদেশৰ ৰাজনৈতিক দলসমূহৰ মতাদৰ্শই দেশৰ সকলো জনসাধাৰণক প্ৰতিনিধিত্ব নকৰে। বৰ্তমানৰ ৰাষ্ট্ৰৰ গাঁথনিটোৱে বাংলাদেশক এখন নতুন আধুনিক ৰাষ্ট্ৰ হিচাপে গঢ়ি তুলিবলৈ একেবাৰেই সক্ষম নহয় বুলিও সমন্ত শ্বাৰমিনে কয়।
আৱামী লীগ আৰু বিএনপি বাংলাদেশৰ প্ৰধান ৰাজনৈতিক দল হিচাপে পৰিগণিত হৈছে। এনে পৰিস্থিতিত শ্বেখ হাছিনাৰ বিৰুদ্ধে প্ৰতিবাদ সাব্যস্ত কৰা প্ৰতিবাদকাৰীসকলে নতুন ৰাজনৈতিক দল গঠনৰ সিদ্ধান্ত লৈছে। এই দলৰ উদ্দেশ্য আৰু এজেণ্ডা কি হ’ব সেয়া বৰ্তমানেও স্পষ্ট হোৱা নাই যদিও বাংলাদেশৰ ৰাজনীতিত আৰু বহু টুইষ্ট এণ্ড টাৰ্ণ যে দেখা যাব সেয়া নিশ্চিত।
