দক্ষিণ-পূব ব্ৰাজিলৰ ৰাজ্য মিনাছ গেৰাইছৰ এটা ঘাইপথত শনিবাৰে পুৱা এখন যাত্ৰীবাহী বাছ আৰু এখন ট্ৰাকৰ মাজত সংঘটিত দুৰ্ঘটনাত ২২ জন লোকৰ মৃত্যু হয়। এই ঘটনাত আন ১৩ জন লোক গুৰুতৰভাৱে আহত হয়।
মিনাছ গেৰাইছৰ অগ্নিনিৰ্বাপক বাহিনীয়ে জানিব দিয়া অনুসৰি আহত হোৱা ১৩ জন লোকক টিওফিলো অটোনি চহৰৰ ওচৰৰ চিকিৎসালয়ত ভৰ্তি কৰোৱা হৈছে। জানিব পৰা মতে, বাছখন চাও পাওলোৰ পৰা ৰাওনা হৈছিল আৰু ৪৫ জন যাত্ৰী কঢ়িয়াই আনিছিল।
কৰ্তৃপক্ষই জনোৱা মতে, বাছখনৰ টায়াৰ ফাটি যোৱাৰ ফলত চালকজনে নিয়ন্ত্ৰণ হেৰুৱাই এখন ট্ৰাকত খুন্দা মাৰে। তিনিজন যাত্ৰী কঢ়িয়াই নিয়া এখন গাড়ীও বাছখনৰ সৈতে সংঘৰ্ষত লিপ্ত হয়। অৱশ্যে এই তিনিওজনৰে প্ৰাণ ৰক্ষা পৰে বুলি অগ্নিনিৰ্বাপক বাহিনীয়ে জনায়।
দুৰ্ঘটনাস্থলীত উদ্ধাৰকাৰী দল উপস্থিত হৈ উদ্ধাৰ অভিযান চলোৱা বুলি অগ্নিনিৰ্বাপক বাহিনীৰ লেফটেনেণ্ট এল’নছ’ই জনায়।
গভৰ্ণৰ ৰোমিউ জেমাই এক্সত লিখিছে যে তেওঁ ভুক্তভোগীসকলক সহায় কৰিবলৈ মিনাছ গেৰাইছ চৰকাৰক “সম্পূৰ্ণ সহায়ৰ”ৰ নিৰ্দেশ প্ৰদান কৰিছে।
জেমাই কয়, ‘আমি এই দুৰ্ঘটনাত পতিত হোৱা ভুক্তভোগীৰ পৰিয়ালসমূহক সম্ভৱপৰ সহায় কৰাটো নিশ্চিত কৰিবলৈ কাম কৰি আছো।’
