দিল্লীত উদ্ধাৰ কৰা হ’ল অসমৰ যুৱতীৰ মৃতদেহ। ফ্লেটত উদ্ধাৰ কৰা হ’ল মৃতদেহ। প্ৰেমিকৰ ছুৰীকাঘাতত মৃত্যু হৈছে যুৱতীৰ। বৰ্তমান দিল্লী আৰক্ষীয়ে গ্ৰেপ্তাৰ কৰিছে ঘাতকৰূপী প্ৰেমিকক।
মৃত যুৱতীগৰাকী শিলচৰৰ ২১ বছৰীয়া স্নেহা নাথ চৌধুৰীৰ। প্ৰেমিক কাছাৰৰ চান্নিঘাটৰ বাসিন্দা ৰাজ কৰ্মকাৰ বুলি জানিব পৰা গৈছে ।
জানিব পৰা মতে, স্নেহা নাথ চৌধুৰী শিলচৰ অম্বিকাপট্টিৰ এখন জিম চেন্টাৰৰ জিম ট্ৰেনাৰ আছিল। দিল্লী পুলিচে দিয়া তথ্য মতে, স্নেহা নাথ চৌধুৰী আৰু ৰাজ কৰ্মকাৰৰ মাজত প্ৰেমৰ সম্পৰ্ক আছিলে । দীৰ্ঘদিনৰ পৰা দুয়োৰে মাজত চলি আছিল বিবাদ ।
শনিবাৰে দিল্লীৰ পাছানপুৰ অঞ্চলত থকা স্নেহাৰ নাথ চৌধুৰীৰ ফ্লেটত হঠাৎ উপস্থিত হয় প্ৰেমিক ৰাজ কৰ্মকাৰ। সেই সময়তে দুয়োৰে মাজত কাজিয়াৰ সৃষ্টি হয়। পৰৱৰ্তীসময়ত দুয়োৰে মাজত হয় হতাহতি। ইয়াৰ মাজত হঠাৎ ৰাজ কৰ্মকাৰে ছুৰীৰে উপৰ্যপুৰি আক্ৰমণ চলাই স্নেহা নাথ চৌধুৰীক । ফলত প্ৰেমিকৰ ছুৰীকাঘাতত থিতাতে মৃত্যু হয় স্নেহা নামৰ যুৱতী গৰাকীৰ ।
ঘটনাৰ খৱৰ পাই ঘটনাস্থলীত দিল্লী আৰক্ষী উপস্থিত হৈ মৃতদেহ উদ্ধাৰ কৰে। লগতে, ফ্লেটৰ পৰা গ্ৰেপ্তাৰ কৰে প্ৰেমিক ৰাজ কৰ্মকাৰক । প্ৰাথমিক তদন্তত প্ৰেমিক ৰাজ কৰ্মকাৰে আৰক্ষীক জনায় যে, তেওঁৰ লগত সম্পৰ্ক থকাৰ পাছতো প্ৰেমিকা স্নেহা নাথ চৌধুৰীয়ে আন এজন যুৱকৰ লগত সম্পৰ্ক স্থাপন কৰি আহিছিল । এই কথা সহ্য কৰিব নোৱাৰি তেওঁ স্নেহাক হত্যা কৰিছে বুলি জনাই দিল্লী আৰক্ষীক । ঘটনা সন্দৰ্ভত দিল্লী আৰক্ষীয়ে তদন্ত অব্যাহত ৰাখিছে ।
