আজি মুম্বাইত অনুষ্ঠিত হ’ব বিচিচিআইৰ বিশেষ সাধাৰণ সভা। আজিৰ এই সভাতেই বিচিচিআইৰ সচিব আৰু কোষাধ্যক্ষ হিচাপে আনুষ্ঠানিকভাৱে নিৰ্বাচিত হ’ব দেৱজিৎ শইকীয়া আৰু প্ৰভতেজ সিং ভাটিয়া।
মঙলবাৰে বিচিচিআইৰ নিৰ্বাচনী বিষয়া তথা ভাৰতৰ প্ৰাক্তন মুখ্য নিৰ্বাচন আয়ুক্ত আচল কুমাৰ জোটিয়ে যেতিয়া তালিকাখন চূড়ান্ত কৰিছিল বিচিচিআইৰ খালী হৈ থকা পদৰ বাবে শইকীয়া আৰু প্ৰভতেজ একমাত্ৰ প্ৰাৰ্থী আছিল।
১ ডিচেম্বৰত জয় শ্বাহ আন্তঃৰাষ্ট্ৰীয় ক্ৰিকেট পৰিষদ (আই চি চি)ৰ অধ্যক্ষ হোৱাৰ পিছৰে পৰা বিচিচিআইৰ অন্তৱৰ্তীকালীন সচিব হিচাপে কাৰ্যনিৰ্বাহ কৰি আহিছে শইকীয়াই। বিচিচিআইৰ সংবিধান অনুসৰি যিকোনো খালী পদ ৪৫ দিনৰ ভিতৰত বিশেষ সাধাৰণ সভাৰ জৰিয়তে পূৰণ কৰিব লাগে। দেওবাৰ এই সময়ছোৱাৰ ৪৩তম দিন।
ইয়াৰ পূৰ্বে আশীষ শ্বেলাৰ বিচিচিআইৰ কোষাধ্যক্ষ আছিল যদিও মহাৰাষ্ট্ৰ চৰকাৰত কেবিনেট মন্ত্ৰী হিচাপে শপত লোৱাৰ পিছত তেওঁ এই কোষাধ্যক্ষ পদ ত্যাগ কৰে। ইয়াৰ পিছতেই ভটিয়াই কোষাধ্যক্ষ পদৰ বাবে মনোনয়ন দাখিল কৰে। এই দুগৰাকী বিষয়ববীয়াৰ নিৰ্বাচনৰ বাবেই বিশেষ সাধাৰণ সভাৰ আহ্বান জনাইছে।
আই চি চিৰ অধ্যক্ষ জয় শ্বাহে বিশেষ আমন্ত্ৰিত সদস্য হিচাপে সভাত অংশগ্ৰহণ কৰিব। এই সময়ছোৱাত বিচিচিআইৰ ৰাজ্যিক সমিতিসমূহে তেওঁক সম্বৰ্ধনা জনাব। যোৱা মাহত গ্ৰেগ বাৰ্কলেৰ ঠাইত শ্বাহে আইচিচিৰ মুৰব্বী হিচাপে দায়িত্ব গ্ৰহণ কৰিছিল।
