কিছু দিন পূৰ্বে নলবাৰীৰ ১৩ বছৰীয়া জন্ময় ৰাজবংশীয়ে বিস্ফোৰক বেটিঙেৰে ক্ৰিকেট মহলত চাঞ্চল্যৰ সৃষ্টি কৰাৰ পিছত এইবাৰ ১৫ বছৰীয়া এগৰাকী মহিলা ক্ৰিকেটাৰে দৃষ্টি কাঢ়িছে অসমৰ ক্ৰিকেট প্ৰেমীৰ।
১৫ বছৰীয়া মহিলা ক্ৰিকেটাৰগৰাকীয়ে দ্বিশতকীয় ইনিংছ খেলি অসমৰ ক্ৰিকেট ইতিহাসত নিজৰ নাম লিপিবদ্ধ কৰিবলৈ সক্ষম হৈছে। অসমৰ মহিলা ক্ৰিকেট ইতিহাসত দ্বিশতক অৰ্জন কৰা তেওঁৱেই প্ৰথম তথা একমাত্ৰ মহিলা ক্ৰিকেটাৰ।
দুৰ্দান্ত দ্বিশতকীয় ইনিংছ খেলি ছ’চিয়েল মিডিয়াত আলোড়নৰ সৃষ্টি কৰা এই ক্ৰিকেটাৰগৰাকী হৈছে ডলী কাৰ্দং।
দৰাচলতে অসম ক্ৰিকেট সন্থাৰ তত্ত্বাৱধানত আৰু গোলাঘাট জিলা ক্ৰীড়া সন্থাৰ আতিথ্যত গোলাঘাটৰ ফৰকাটিং ষ্টেডিয়ামত অনুষ্ঠিত হৈ থকা ১৫ বছৰ অনূৰ্ধ্ব ছোৱালীৰ আন্তঃজিলা ক্ৰিকেট প্ৰতিযোগিতা ২০২৫-ৰ এখন মেচত এই বিৰল অভিলেখৰ গৰাকী হয় কাৰ্দং।
আজি যোৰহাটৰ বিৰুদ্ধে অনুষ্ঠিত ৩৫ অ’ভাৰৰ খেলত বোকাখাত ক্ৰিকেট দলৰ অধিনায়িকা ডলী কাৰ্দঙে ১২৪টা বলৰ সন্মুখীন হৈ অপৰাজিত ২০৫ ৰানৰ এক সুন্দৰ ইনিংছ খেলে। কাৰ্দঙৰ ইনিংছটোত আছিল ২১টা চাৰি আৰু ১৩টা ছয়।
কাৰ্দঙৰ এই অনবদ্য ইনিংছৰ সহায়তেই বোকাখাত দলে যোৰহাটক ১৮৮ ৰানত পৰাস্ত কৰিবলৈ সক্ষম হয়।
উল্লেখ্য যে. কিছু দিন পূৰ্বে ১৩ বছৰৰ অনূৰ্ধ্বৰ সদৌ অসম আন্তঃকোচিং ক্ৰিকেট প্ৰতিযোগিতাৰ প্ৰথম ৰাউণ্ডৰ খেলত নলবাৰীৰ গৰ্ডন ক্ৰিকেট একাডেমীৰ প্ৰশিক্ষাৰ্থী জন্ময় ৰাজবংশীয়ে ১৩৯ বলত ৪৩০ ৰানৰ বিস্ফোৰক ইনিংছ খেলি ৰাজ্যৰ লগতে ৰাষ্ট্ৰীয় পৰ্যায়তো চৰ্চাৰ কেন্দ্ৰ বিন্দু হৈ পৰিছিল।
