অক্টোবৰ মাহত উত্তৰ ২৪ পৰগনা জিলাত দলীয় অনুষ্ঠানৰ সময়ত প্ৰৰোচনামূলক ভাষণ দিয়াৰ অভিযোগত অভিনেতাৰ পৰা বিজেপি নেতা হোৱা মিথুন চক্ৰৱৰ্তীৰ বিৰুদ্ধে বুধবাৰে বিধাননগৰ আৰক্ষীয়ে এফআইআৰ ৰুজু কৰে।
আৰক্ষী সূত্ৰ অনুসৰি চক্ৰৱৰ্তীৰ বিৰুদ্ধে অভিযোগ ২৭ অক্টোবৰত ছল্ট লেক অঞ্চলৰ ইজেডচিচিত বিজেপিৰ অনুষ্ঠানৰ সময়ত তেওঁ দিয়া ভাষণৰ সৈতে জড়িত, যাৰ ভিত্তিত আৰক্ষীয়ে বিধাননগৰ দক্ষিণ থানাত এফআইআৰ ৰুজু কৰিছে।
ভাৰতীয় জনতা পাৰ্টিৰ সদস্যপদ অভিযানৰ পশ্চিম বংগ পৰ্যায়ৰ শুভাৰম্ভণিৰ উদ্দেশ্যে আয়োজিত এই অনুষ্ঠানত কেন্দ্ৰীয় গৃহমন্ত্ৰী অমিত শ্বাহো উপস্থিত আছিল। বিধাননগৰ আৰক্ষীৰ এগৰাকী জ্যেষ্ঠ বিষয়াই কয়, ‘আমি বিষয়টোৰ তদন্ত আৰম্ভ কৰিছো।’
আৰক্ষীৰ এই পদক্ষেপৰ পিছতেই বিজেপিৰ ৰাজ্যিক সভাপতি তথা কেন্দ্ৰীয় মন্ত্ৰী সুকান্ত মজুমদাৰে এই এফআইআৰক “প্ৰতিশোধৰ ৰাজনীতি”ৰ ফল বুলি অভিহিত কৰে। তেওঁ কয়, ‘তেওঁৰ ভাষণত প্ৰৰোচনামূলক একো নাছিল। এয়া মাথোঁ আৰক্ষীক ৰাজনৈতিক অস্ত্ৰ হিচাপে ব্যৱহাৰ কৰি ভয় খুৱাবলৈ কৰা প্ৰয়াস।‘
২৭ অক্টোবৰত অনুষ্ঠিত সভাখনত চক্ৰৱৰ্তীয়ে ২০২৬ চনৰ বিধানসভা নিৰ্বাচনৰ পিছত পশ্চিম বংগৰ শাসন বিজেপিৰ হ’ব বুলি কৈছিল আৰু এই লক্ষ্যত উপনীত হ’বলৈ যিকোনো পৰ্যায়লৈ যাব বুলি মন্তব্য কৰিছিল।
