দল বাগৰা ৰাজনীতিৰ বাবে চিৰ পৰিচিত নেতা তথা বিভিন্ন আপত্তিজনক মন্তব্যৰ বাবে সংবাদ মাধ্যমৰ শিৰোণাম দখল কৰি থকা দুলু আহমেদৰ বিৰুদ্ধে দাখিল কৰা হৈছে এজাহাৰ।
শেহতীয়াকৈ অসম জাতীয় পৰিষদ ত্যাগ কৰি তৃণমূল কংগ্ৰেছত যোগ দিয়া দুলু আহমেদৰ বিৰুদ্ধে দেওবাৰে হাজো আৰক্ষী থানাত দাখিল হৈছে এজাহাৰ। অসম প্ৰদেশ কংগ্ৰেছ কমিটিৰ সম্পাদক ৰুবুল আলীয়ে দাখিল কৰিছে এজাহাৰ।
উল্লেখ্য যে, পঞ্চায়ত নিৰ্বাচনক কেন্দ্ৰ কৰি হাজোৰ বিভিন্ন অঞ্চলত প্ৰচাৰ কাৰ্যত অংশ লৈ দুলু আহমেদে কংগ্ৰেছ দলৰ জ্যেষ্ঠ নেতা আনোৱাৰ হুছেইন (গণেশ) গৰু চোৰত জড়িত বুলি মন্তব্য কৰিছিল। কেৱল এয়াই নহয় আনোৱাৰ হুছেইনৰ পৰিয়ালটোৱে চুৰি গৰু ধুবুৰীত বিক্ৰী কৰাৰ লগতে বিভিন্ন মন্দিৰ কমিটিয়ে এৰি দিয়া গৰুবোৰো চুৰি কৰাৰ অভিযোগ উত্থাপন কৰিছিল।
দুলু আহমেদে কৰা এই মন্তব্যৰ বাবে আনোৱাৰ হুছেইন আৰু তেওঁৰ পৰিয়ালক জনমানসত হেয় প্ৰতিপন্ন কৰা বুলি দাবী কৰি এজাহাৰ দাখিল কৰাৰ লগতে তৃণমূল কংগ্ৰেছৰ নেতাগৰাকীৰ বিৰুদ্ধে বিহিত ব্যৱস্থা গ্ৰহণৰ দাবী জনায়।
