বুধবাৰে তীৰ্থনগৰী হাজোত অসমৰ দ্বিতীয় গৰাকী মুখ্যমন্ত্ৰী তথা প্ৰথম অসমীয়া ৰাজ্যপাল লৌহমানৱ বিষ্ণুৰাম মেধিৰ প্ৰতিমূৰ্ত্তি উন্মোচন কৰিব অসমৰ মুখ্যমন্ত্ৰী ড০ হিমন্ত বিশ্ব শৰ্মাই।
প্ৰয়াত বিষ্ণুৰাম মেধিৰ হাজো ভৰালীটোলাস্থিত নিজ বাসভৱন, “শিশু কল্যাণ ভৱন”ত প্ৰতিমূৰ্ত্তি উন্মোচন কৰা হ’ব বুলি জানিবলৈ দিয়ে মুখ্যমন্ত্ৰী ড০ শৰ্মাই। বুধবাৰে পুৱা ১০.৩০ বজাত সাত ফুট উচ্চতাৰ প্ৰতিমূৰ্ত্তি উন্মোচন কৰি এক ৰাজহুৱা সভাত অংশগ্ৰহণ কৰিব মুখ্যমন্ত্ৰীয়ে।
এই অনুষ্ঠানটোতেই মুখ্যমন্ত্ৰীয়ে “লৌহমানৱ” শীৰ্ষক এখন স্মৃতিগ্ৰন্থও উন্মোচন কৰিব।
লৌহমানৱ বিষ্ণুৰাম মেধিৰ স্মৃতি আৰু কৰ্মৰাজী সজীৱ কৰি ৰাখিবলৈ “লৌহমানৱ বিষ্ণুৰাম মেধি স্মৃতি সুৰক্ষা সমিতি”, “প্ৰতিমূৰ্ত্তি নিৰ্মাণ সমিতি”ৰ লগতে হাজোবাসী ৰাইজে অনুষ্ঠানটি সফল কৰিবলৈ স্বতঃস্ফূৰ্ত সহায়ৰ হাত আগবঢ়াইছে।
এই অনুষ্ঠানৰ আৰম্ভণিতে এটি বৰগীত পৰিবেশন কৰিব আন্তঃৰাষ্ট্ৰীয় বঁটাপ্ৰাপক জনপ্ৰিয় সংগীত শিল্পী তৰালী শৰ্মা আৰু কল্লোল বৰঠাকুৰে। উক্ত অনুষ্ঠানটিলৈ সমূহ ৰাইজৰ উপস্থিতি শ্ৰদ্ধাৰে কামনা কৰিছে “লৌহমানৱ বিষ্ণুৰাম মেধি প্ৰতিমূৰ্ত্তি নিৰ্মাণ সমিতি”য়ে।
ইফালে মূৰ্ত্তি উন্মোচনৰ বাবে মুখ্যমন্ত্ৰী ড০ হিমন্ত বিশ্ব শৰ্মাক চেঁচা দলঙৰ পৰা পাখামেলালৈ মটৰ চাইকেল ৰেলীৰে আদৰি অনাৰ প্ৰস্তুতি চলাইছে হাজো বিজেপিৰ যুৱ মৰ্চাই।
