‘যিখন বাংলাদেশক মই ভাল পাঁও, সেইখন দেশৰ শ শ লোকৰ মৃত্যু হৈছে। মোৰ হৃদয় বেথাৰে উপচি পৰিছে। এই কঠিন সময়ত মই মোৰ মাক চাব পৰা নাই, তেওঁক সাৱটি ল’ব পৰা নাই। ইয়াৰ বাবে মই দুঃখিত। বিশ্ব স্বাস্থ্য সংস্থাৰ দক্ষিণ পূব এছিয়াৰ আঞ্চলিক সঞ্চালক হিচাপে মই মোৰ দায়িত্ব পালন কৰি যাম।‘
সামাজিক মাধ্যম X (পূৰ্বৰ টুইটাৰ)ত এইদৰে টুইট কৰিছে বাংলাদেশৰ পৰা পলায়ন কৰা পদত্যাগী প্ৰধানমন্ত্ৰী শ্বেখ হাছিনাৰ কন্যা ছাইমা ৱাজেদে।
বিগত এমাহ ধৰি বাংলাদেশত চৰকাৰী চাকৰিত সংৰক্ষণৰ বিৰোধিতাৰে প্ৰতিবাদ অব্যাহত আছে। ভয়াৱহ পৰিস্থিতিৰ মাজতে পদত্যাগ কৰি দেশ এৰি ভাৰতত আশ্ৰয় লবলৈ বাধ্য হৈছে প্ৰধানমন্ত্ৰী শ্বেখ হাছিনাই।
শেহতীয়াকৈ বাংলাদেশৰ ভয়াৱহ পৰিস্থিতিক লৈ প্ৰতিক্ৰিয়া প্ৰকাশ কৰিছে শ্বেখ হাছিনাৰ কন্যাই। বাংলাদেশৰ শেহতীয়া পৰিস্থিতিক লৈ সামাজিক মাধ্যমত দুখ প্ৰকাশ কৰিছে ছাইমা ৱাজেদে।
উল্লেখ্য যে যোৱা ফেব্ৰুৱাৰীত বিশ্ব স্বাস্থ্য সংস্থাৰ দক্ষিণ পূব এছিয়াৰ আঞ্চলিক সঞ্চালক হিচাপে দায়িত্বভাৰ গ্ৰহণ কৰিছিল ছাইমা ৱাজেদে। ছাইমা এই পদৰ দায়িত্বভাৰ লোৱা প্ৰথম বাংলাদেশী আৰু দ্বিতীয়গৰাকী মহিলা।
শ্বেখ হাছিনা চৰকাৰৰ পতনৰ পিছতে সেনাই দেশৰ দায়িত্বভাৰ গ্ৰহণ কৰে। আজি ন’বেল বঁটা বিজয়ী ড০ মহম্মদ ইউনুছৰ নেতৃত্বত দেশখনত অন্তৱৰ্তীকালীন চৰকাৰৰ সদস্যসকলে শপত ল’ব।
