বৃহস্পতিবাৰে গোৱালপাৰা জিলাৰ কৃষ্ণাইৰ পাইকানত উচ্ছেদিত লোক আৰু প্ৰশাসনৰ মাজত হোৱা হিংসাত্মক পৰিস্থিতিত এজন ১৯ বছৰীয়া যুৱকৰ মৃত্যু হোৱা ঘটনাৰ বাবে কংগ্ৰেছ নেতা ৰাহুল গান্ধী আৰু দলটোৰ ৰাষ্ট্ৰীয় অধ্যক্ষ মল্লিকাৰ্জুন খাৰ্গেক দোষাৰোপ কৰিছে বিজেপি নেতৃত্বাধীন চৰকাৰে।
পাইকানৰ বনাঞ্চলত চলোৱা উচ্ছেদ অভিযানৰ পাঁচ দিনৰ পিছত অৰ্থাত ১৫ জুলাইত আৰক্ষী আৰু বনৰক্ষী বাহিনীৰ দলে পাইকানৰ উচ্ছেদস্থলীত উপস্থিত হোৱাৰ পিছতে শ-শ উচ্ছেদিতই নিৰাপত্তাৰক্ষী দলৰ ওপৰত আক্ৰমণ চলাইছিল।
পৰিস্থিতি নিয়ন্ত্ৰণৰ বাবে আৰক্ষীয়ে শুন্যলৈ গুলীচালনা কৰাত এজন যুৱকৰ মৃত্যু হোৱাৰ লগতে আন এজন গুৰুতৰভাৱে আহত হয়। ইফালে উচ্ছেদিতৰ আক্ৰমণত প্ৰায় ২০ গৰাকী নিৰাপত্তাৰক্ষীও আহত হৈছিল।
পাইকানত সংঘটিত এই ভয়ংকৰ কাণ্ডৰ পিছতেই ৰাজ্যৰ বিভিন্ন প্ৰান্তত ইয়াৰ বিৰুদ্ধে তীব্ৰ প্ৰতিক্ৰিয়াৰো সৃষ্টি হয়। এই প্ৰতিক্ৰিয়াৰ প্ৰত্যুত্তৰ দি মুখ্যমন্ত্ৰী শৰ্মাই কংগ্ৰেছৰ প্ৰৰোচনাতেই পাইকানত ভয়াৱহ কাণ্ড সংঘটিত হোৱা বুলি উল্লেখ কৰে।
উল্লেখ্য যে, ১৬ জুলাইত কংগ্ৰেছ নেতা ৰাহুল গান্ধী আৰু দলটোৰ ৰাষ্ট্ৰীয় অধ্যক্ষ মল্লিকাৰ্জুন খাৰ্গেই ছয়গাঁৱত এখন জনসভা সম্বোধন কৰি অসমত কংগ্ৰেছ দল শাসনলৈ আহিলে বৰ্তমানৰ ৰাজ্য চৰকাৰে উচ্ছেদ কৰা লোকসকলক ঘৰ সাজি দিম বুলি আপত্তিজনক মন্তব্য কৰিছিল।
এই মন্তব্যৰ এদিন পিছতেই অৰ্থাত ১৭ জুলাইত কৃষ্ণাইৰ পাইকানত অপ্ৰীতিকৰ পৰিস্থিতিৰ উদ্ভৱ হয়। যদিহে কংগ্ৰেছ নেতা দুগৰাকীৰ মন্তব্যত প্ৰৰোচিত হৈ উচ্ছেদিত লোকসকলে নিৰাপত্তাৰক্ষীৰ ওপৰত আক্ৰমণ কৰা কাৰ্য প্ৰমাণ হয় তেন্তে পৰৱৰ্তী সময়ত দুয়োজন নেতাই জেৰাৰ সন্মুখীন হ’ব পাৰে বুলিও আজি এক সংবাদমেলত মুখ্যমন্ত্ৰী শৰ্মাই উল্লেখ কৰে।
আনহাতে বিৰোধীয়ে গৃহহীন হৈ পৰা পৰিয়ালসমূহৰ প্ৰতি “অমানৱীয় ব্যৱহাৰ”ৰ বাবে প্ৰশাসনক তীব্ৰ সমালোচনা কৰিছে।
উল্লেখ্য যে, যোৱা ১২ এপ্ৰিলত গোৱালপাৰা জিলা প্ৰশাসনে পাইকানৰ ১৪০ হেক্টৰ ভূমিত অবৈধভাৱে বসবাস কৰি থকা ১,০৮০টা পৰিয়ালক উচ্ছেদ কৰিছিল। অৱশ্যে এই উচ্ছেদৰ পিছতো বহু লোকে সেই ঠাই এৰি যোৱা নাছিল আৰু যাৰ বাবে ১৭ জুলাইত এই ভয়ংকৰ ঘটনাৰ সূচনা হয়।
