অষ্ট্ৰেলিয়াক ৪ উইকেটত পৰাস্ত কৰি চেম্পিয়নছ ট্ৰফীৰ ফাইনেলত প্ৰৱেশ কৰিছে ভাৰতে। ডুবাইত অনুষ্ঠিত হোৱা প্ৰতিযোগিতাখনৰ প্ৰথমখন ছেমি ফাইনেলত অষ্ট্ৰেলিয়াই প্ৰথমে বেট ধৰি ২৬৪ ৰান সংগ্ৰহ কৰিছে। ইয়াৰ প্ৰত্যুত্তৰত ভাৰতে ৬টা উইকেট হেৰুৱাই ১১টা বল বাকী থাকোতেই মেচখন জয়ী হয়।
ভাৰতৰ এই বিজয়ত সবাটোকৈ বৃহত অৱদান আগবঢ়াই বিৰাট কোহলীয়ে। এটা সময়ত শুভমন গীল আৰু ৰোহিত শৰ্মাৰ উইকেট হেৰুৱাই শলঠেকত পৰিছিল যদিও বিৰাট কোহলী আৰু শ্ৰেয়াছ আয়াৰে সুন্দৰভাৱে ক্ৰিজত থাকি মেচখন ভাৰতৰ পক্ষত লৈ আনে।
বিৰাট কোহলীয়ে ৮৪ ৰানৰ ইনিংছ খেলাৰ বিপৰীতে শ্ৰেয়াছ আয়াৰে আগবঢ়াই ৪৫ ৰানৰ গুৰুত্বপূৰ্ণ অৱদান। আনহাতে মেচৰ শেষৰপিনে কে এল ৰাহুল আৰু হাৰ্দিক পাণ্ডিয়াইও দৃঢ়তাৰে খেলি ভাৰতক বিজয়ৰ দিশে লৈ যায়। ৰাহুলে ৪২ ৰান কৰাৰ বিপৰীতে পাণ্ডিয়াই খেলে ২৮ ৰানৰ ইনিংছ।
উল্লেখ্য যে, অষ্ট্ৰেলিয়াৰ অধিনায়ক গ্ৰেম স্মিথৰ ৭৩ আৰু এলেক্স কেৰীৰ ৬১ ৰানৰ গুৰুত্বপূৰ্ণ অৱদানেৰে ২৬৫ ৰানৰ লক্ষ্য বান্ধি দিছিল ভাৰতক। ভাৰতৰ হৈ মহম্মদ ছামী সৰ্বাধিক তিনিটা উইকেট লাভ কৰাৰ বিপৰীতে বৰুণ চক্ৰৱৰ্তী আৰু ৰবীন্দ্ৰ জাদেজাই দুটাকৈ উইকেট লাভ কৰে। পাণ্ডিয়া আৰু অক্সৰেও লাভ কৰে এটাকৈ উইকেট।
স্মৰ্তব্য যে চেম্পিয়নছ ট্ৰফী প্ৰতিযোগিতাৰ ফাইনেলত প্ৰৱেশৰ হেট্ৰিক অৰ্জন কৰিছে ভাৰতে। ইয়াৰ পূৰ্বে টিম ইণ্ডিয়াই ২০১৩ চনৰ চেম্পিয়নছ ট্ৰফী খিতাপ দখল কৰিছিল। ইয়াৰ পিছত ২০১৭ চনত অনুষ্ঠিত হোৱা চেম্পিয়নছ ট্ৰফীৰ ফাইনেলত ভাৰতে প্ৰৱেশ কৰিছিল যদিও পাকিস্তানৰ হাতত ১৮০ ৰানৰ বৃহৎ পৰাজয়ৰ সন্মুখীন হ’বলগীয়া হৈছিল।
২০১৭ চনৰ কথা পাহৰি এইবাৰৰ প্ৰতিযোগিতা অৱতীৰ্ণ হোৱা ভাৰতে পুনৰবাৰ অৰ্থাত একেৰাহে তৃতীয়বাৰৰ বাবে ফাইনেলত প্ৰৱেশ কৰি ট্ৰফী জয়ৰ চেষ্টা চলাব। কাইলৈ দক্ষিণ আফ্ৰিকা আৰু নিউজিলেণ্ডৰ মাজত হ’বলগীয়া দ্বিতীয়খন ছেমিফাইনেলৰ বিজয়ী দলৰ লগত অহা ৯ মাৰ্চত মুখামুখি হ’ব ভাৰত।
আজিৰ মেচখনত ভাৰতৰ বিৰাট কোহলীয়ে মেন অৱ দ্যা মেচৰ সন্মান লাভ কৰে।
