ভাৰতীয় ক্ৰিকেট দলৰ বেগী বলাৰ সিদ্ধাৰ্থ কৌলে অৱসৰ গ্ৰহণ কৰাৰ কথা ঘোষণা কৰিছে। ক্ৰিকেটাৰগৰাকীয়ে ক্ৰিকেটৰ সকলো ফৰ্মেটৰ পৰা অৱসৰ লোৱা বুলি জনায়।
সিদ্ধাৰ্থ কৌলে আন্তঃৰাষ্ট্ৰীয় ক্ৰিকেটত ভাৰতৰ হৈ ৩ খন এদিনীয়া আৰু ৩ খন টি-২০ মেচ খেলিছে। ভাৰতীয় দলক প্ৰতিনিধিত্ব কৰাৰ সমান্তৰালকৈ তেওঁ ইণ্ডিয়ান প্ৰিমিয়াৰ লীগ চমুকৈ আই পি এলতো খেলিছে।
আই পি এলত সিদ্ধাৰ্থই ছানৰাইজাৰ্ছ হায়দৰাবাদ, ৰয়েল চেলেঞ্জাৰছ বেংগালুৰুকে ধৰি কেইবাটাও দলৰ হৈ খেলিছিল। কিন্তু আই পি এল ২০২৪ৰ মেগা নিলামত তেওঁক কোনো দলে ক্ৰয় কৰা নাছিল। সেয়ে তেওঁ অৱসৰ গ্ৰহণ কৰা বুলি ধাৰণা কৰা হৈছে।
সিদ্ধাৰ্থই সামাজিক মাধ্যম ইনষ্টাগ্ৰামৰ জৰিয়তে এটা পোষ্ট শ্বেয়াৰ কৰি অৱসৰৰ কথা ৰাজহুৱা কৰে। প’ষ্টটোৰ জৰিয়তে তেওঁ কয় যে তেওঁ ভাৰতীয় ক্ৰিকেটৰ পৰা অৱসৰ লৈছে।
উল্লেখ্য যে, বিৰাট কোহলীৰ নেতৃত্বত জয়ী হোৱা ১৯ বছৰ অনুৰ্ধ বিশ্বকাপ বিজয়ী দলৰো অংশ আছিল সিদ্ধাৰ্থ কৌল। ২০০৮ চনত তেওঁ আৰু কোহলী একেটা দলৰ অংশ আছিল।
২০১৮ চনত ভাৰতীয় ছিনিয়ৰ দলৰ হৈ প্ৰথমখন এদিনীয়া মেচ খেলিছিল সিদ্ধাৰ্থ কৌলে। একে বছৰতে তেওঁ প্ৰথমবাৰৰ বাবে টি-২০ ইণ্টাৰনেশ্যনেল মেচতো খেলিছিল।
২০১৬ চনত ছানৰাইজাৰ্ছ হায়দৰাবাদে তেওঁলোকৰ দলত অন্তৰ্ভুক্ত কৰিছিল সিদ্ধাৰ্থক। ইয়াৰ পূৰ্বে ২০১৩ চনত তেওঁ আই পি এলত প্ৰথমখন মেচ খেলিছিল। হায়দৰাবাদৰ লগতে সিদ্ধাৰ্থই কলকাতা নাইট ৰাইডাৰ্ছ, দিল্লী ডেয়াৰডেভিলছ আৰু ৰয়েল চেলেঞ্জাৰছ বেংগালুৰুৰ হৈ খেলিছে।
এই পৰ্যন্ত আই পি এলত ৫৪খন খেল খেলিছে সিদ্ধাৰ্থই। তেওঁ লাভ কৰিছে ৫৮টা উইকেট। তেওঁৰ সৰ্বোত্তম প্ৰদৰ্শন আছিল এখন মেচত ২৯ ৰানত ৪টা উইকেট।
উল্লেখ্য যে, সিদ্ধাৰ্থই ভাৰতৰ হৈ ৩ খন এদিনীয়া খেল খেলিছে। অৱশ্যে তেওঁ এটাও উইকেট লাভ কৰা নাছিল। ২০১৮ চনত আফগানিস্তানৰ বিৰুদ্ধে শেষৰখন এদিনীয়া খেলিছিল।
ইফালে শেষৰখন টি-২০ মেচ ২০১৯ চনত অষ্ট্ৰেলিয়াৰ বিৰুদ্ধে খেলিছিল। ভাৰতৰ হৈ ৩ খন টি-২০ মেচত ৪ টা উইকেট দখল কৰিছে সিদ্ধাৰ্থই।
