মাইক্ৰ’ছফ্টৰ অচলাৱস্থাৰ প্ৰভাৱ কেৱল আমেৰিকাতেই নহয়, বিশ্বৰ সকলো দেশতে দেখা দিছিল। ইয়াৰ সৰ্বাত্মক প্ৰভাৱ দেখা গৈছিল এয়াৰলাইন্স কোম্পানীত। কালিৰ দিনটোত সমগ্ৰ বিশ্বতে বিমান সংস্থাৰ পৰিচালনা ব্যাহত হৈ পৰে, যাৰ ফলত এয়াৰলাইন্স কোম্পানীসমূহৰ শ্বেয়াৰ যথেষ্ট পৰিমানে হ্বাস পোৱা পৰিলক্ষিত হৈছে।
যদি ভাৰতৰ কথা উল্লেখ কৰো তেন্তে, দেশৰ সৰ্ববৃহত এয়াৰলাইন ইণ্ডিগোৰ শ্বেয়াৰত অভাৱনীয় খহনীয়া দেখা গৈছে, যাৰ পৰিণতিত কোম্পানীটোৰ প্ৰায় ৫৩০০ কোটি টকাৰ লোকচান হয়।
ইণ্ডিগোৱে স্পষ্ট কৰি দিছে যে বন্ধৰ দিনতো যাত্ৰীসকলে সমস্যাৰ সন্মুখীন হ’ব পাৰে। যদিও পুনৰ বিমান সেৱা আৰম্ভ হৈছে কিন্তু বেকলগ ক্লিয়াৰ কৰিবলৈ কিছু সময় লাগিব পাৰে।
কোম্পানীটোৱে যাত্ৰীসকলক বিমানবন্দৰলৈ যোৱাৰ পূৰ্বে তেওঁলোকৰ বিমানৰ অৱস্থিতিৰ পৰীক্ষা কৰিবলৈ কয়। লগতে যদি কোনো যাত্ৰীৰ বিমান বাতিল হয় তেন্তে তেওঁলোকে বিকল্প বিমান বা সম্পূৰ্ণ ধন ঘূৰাই পোৱাৰ বাবে আবেদন কৰিব পাৰে বুলিও কোৱা হৈছে।
উল্লেখ্য যে, শুকুৰবাৰে মাইক্ৰ’ছফ্টৰ অচলাৱস্থাৰ বাবে সমগ্ৰ বিশ্বজুৰি চাইবাৰ জগতৰ সৈতে সম্পৰ্ক থকা সেৱা, ব্যৱসায়, কাম-কাজ ব্যাহত হৈ পৰে। বিমান, বেংক, ষ্টক একচেঞ্জ, ডিজিটেল লেনদেন আৰু জৰুৰী সেৱাত ব্যাপক প্ৰভাৱ পৰে।
বিশ্বৰ বহু ঠাইত বিমানৰ উৰণত পলম হয়, কিছু বিমান বাতিলো কৰা হয়, বেংকৰ কাম-কাজ, ষ্টক একচেঞ্জৰ কাম-কাজ স্থবিৰ হৈ পৰে তথা ডিজিটেল লেনদেনো ব্যাহত হয়।
