ইৰাণৰ ৰাষ্ট্ৰপতি মাছুদ পেজেছকিয়ানৰ তাব্ৰিজ ভ্ৰমণৰ সময়ত এক অদ্ভুত পৰিস্থিতিৰ সৃষ্টি হয়, যেতিয়া তেওঁৰ কনভয়ত থকা তিনিখন চৰকাৰী বাহন একে সময়তে বিকল হৈ পৰে। ৰাষ্ট্ৰপতিৰ বিশেষ পৰিদৰ্শক মুস্তাফা মোলাভিয়ে জনোৱা মতে, কাজভি প্ৰদেশৰ টাকেস্তান চহৰৰ সমীপত অৱস্থিত পেট্ৰ’ল পাম্পৰ পৰা ইন্ধন ভৰোৱাৰ কিছু সময়ৰ পিছতে সকলো বাহন ৰৈ যায়। ইয়াৰ পিছত তেওঁ ব্যক্তিগত টেক্সি এখনত উঠি পৰৱৰ্তী যাত্ৰা সম্পূৰ্ণ কৰিব লগা হয়।
অনুসন্ধানৰ অন্তত দেখা যায় যে ইন্ধনত পানী মিহলি হৈ আছে। এই ঘটনাৰ পিছতে ৰাষ্ট্ৰপতিয়ে স্থানীয় কৰ্তৃপক্ষক অৱগত নকৰাকৈয়ে ব্যক্তিগত টেক্সিৰে যাত্ৰা সম্পূৰ্ণ কৰাৰ সিদ্ধান্ত লয়। এই ঘটনাই ইৰাণৰ ইন্ধনৰ মানদণ্ড আৰু পেট্ৰ’ল পাম্পত নিৰীক্ষণ প্ৰক্ৰিয়াক লৈ গুৰুতৰ প্ৰশ্নৰ উত্থাপন কৰিছে।
ইৰাণত ইন্ধনত মিশ্ৰণ নতুন কথা নহয়। বছৰ বছৰ ধৰি পেট্ৰ’লৰ মিশ্ৰণ বা পাম্প মিটাৰৰ বিজুতিৰ অভিযোগ চৰ্চালৈ আহিছে। প্ৰাক্তন তৈল মন্ত্ৰী বিজন জাংগানেও ২০২১ চনত কয় যে প্ৰতি বছৰে ৪০০ৰো অধিক পেট্ৰ’ল পাম্প অপাৰেটৰৰ বিৰুদ্ধে ব্যৱস্থা গ্ৰহণ কৰা হয়। সমস্যা ইয়াতেই ক্ষান্ত নাথাকে। ২০২৪ চনৰ জুন মাহত ইৰাণ ইণ্টাৰনেশ্যনেলে প্ৰকাশ কৰা এক গোপন প্ৰতিবেদনত কোৱা হৈছে যে দেশত ইন্ধন উৎপাদন আৰু চাহিদাৰ মাজত ভাৰসাম্যহীনতা বৃদ্ধি পাইছে। এই অভাৱ পূৰণৰ বাবে ইৰাণে পেট্ৰ’কেমিকেলৰ পৰা আহৰণ কৰা গেছ’লিনৰ ওপৰত নিৰ্ভৰ কৰে, য’ত মিথাইল, টাৰ্ট-বুটাইল, ইথাৰ (MTBE)ৰ দৰে ৰাসায়নিক পদাৰ্থ ব্যৱহাৰ কৰা হয়। পৰিৱেশ আৰু স্বাস্থ্যৰ বাবে বিপজ্জনক বুলি বিবেচিত হোৱাৰ বাবে বহু দেশত এমটিবিই নিষিদ্ধ কৰা হৈছে। ইয়াৰ পিছতো ইৰাণৰ প্ৰধান শোধনাগাৰত ইয়াৰ ব্যৱহাৰ অব্যাহত আছে।
ছ’চিয়েল মিডিয়া আৰু বিভিন্ন প্লেটফৰ্মত শ্বেয়াৰ কৰা ভিডিঅ’ত ইৰানৰ নিম্নমানৰ পেট্ৰ’ল আৰু পাম্প মিটাৰৰ লগত খেলা-ধূলা কৰাৰ প্ৰমাণ পোৱা গৈছে।
