ছিৰিয়াৰ পৰা ৰাষ্ট্ৰপতি বাছাৰ আল আছাদ পলায়নৰ পিছত প্ৰায় সমগ্ৰ ছিৰিয়াৰ বিদ্ৰোহী সংগঠনে দখল কৰিছে। বিদ্ৰোহী যোদ্ধাসকলে দামাস্কাছত প্ৰৱেশ কৰাৰ লগে লগে তাত থকা লোকসকলে তেওঁলোকক আদৰি লৈ উদযাপন কৰে।
ছিৰিয়াত বাছাৰ আল আছাদক উৎখাত কৰাটো ইৰাণৰ বাবে এক ডাঙৰ জোকাৰণিতকৈ কম নহয়। পূৰ্বতে ছিৰিয়া চৰকাৰত ইৰাণৰ ডাঙৰ ভূমিকা আছিল আৰু এতিয়া ইয়াত চুন্নী গোটে শাসন কৰিবলৈ অহাৰ পিছতে ইয়াৰ বাবে সমস্যাৰ সৃষ্টি হ’ব পাৰে।
ইৰাণৰ সংবাদ মাধ্যমৰ প্ৰতিবেদন অনুসৰি, ছিৰিয়াৰ বিদ্ৰোহীয়ে দামাস্কাছ দখল কৰাৰ পিছতেই ইৰাণৰ দূতাবাসত আক্ৰমণ চলাইছিল। ছ’চিয়েল মিডিয়াৰ ফুটেজত দেখা গৈছে যে, নিহত হিজবুল্লাহৰ নেতা হাছান নছৰল্লাহ আৰু নিহত ইৰাণৰ কুদছ বাহিনীৰ মুৰব্বী কাছেম ছলেমানীৰ বেনাৰ ৰাইজে নষ্ট কৰি পেলাইছে।
ইৰাণৰ দূতাবাসত আক্ৰমণ কৰি বিদ্ৰোহী আৰু তেওঁলোকৰ সমৰ্থক গোটটোৱে ইংগিত দিছে যে ছিৰিয়াৰ নতুন যুগত ইৰাণৰ কোনো স্থান নাই। আনহাতে ইজৰাইলেও ছিৰিয়াৰ সকলো কাৰ্যকলাপৰ ওপৰত চকু ৰাখিছে, ইজৰাইলৰ বিষয়াসকলে কয় যে, বিদ্ৰোহী গোটটোৰ মৌলিক মতাদৰ্শক লৈ চিন্তিত সকলো। ইজৰাইলে আশংকা কৰিছে যে, বিদ্ৰোহী সংগঠনে গোলান উচ্চতাৰ পৰা ইজৰাইলক আক্ৰমণ কৰিব পাৰে।
বাছাৰ আল আছাদ আছিল এজন ছিয়া নেতা, যিয়ে ২৪ বছৰ ধৰি মুছলমান সংখ্যাগৰিষ্ঠ ছিৰিয়াত শাসন কৰিছিল। বহু প্ৰতিবাদক নিৰ্মমভাৱে দমন কৰাৰ ইতিহাস আছে আছাদৰ। বিশ্বজুৰি সমালোচনাৰ সন্মুখীন হোৱাৰ পাছতো ইৰাণে ছিৰিয়াক সমৰ্থন কৰি থাকে আৰু ২০১১ চনৰ বিদ্ৰোহৰ পিছত আছাদ চৰকাৰৰ অস্তিত্ব ৰক্ষাত গুৰুত্বপূৰ্ণ ভূমিকা পালন কৰে।
ছিৰিয়াৰ সেনাক অৰ্থনৈতিক আৰু সামৰিক সহায় আগবঢ়োৱাৰ সমান্তৰালকৈ ইৰাণেও তেওঁলোকক আন বহু ধৰণৰ সহায় আগবঢ়ায়। ২০১১ চনৰ পিছত ৰাছিয়া আৰু ইৰাণৰ সৈতে ছিৰিয়াৰ বন্ধুত্ব গভীৰ হৈ পৰে, যাৰ সহায়ত ই সকলো বিদ্ৰোহক সফলতাৰে নাশ কৰে।
