ইৰাণৰ আইন অতি কঠোৰ। ইয়াত হিজাব পৰিধান নকৰা মহিলাসকলক শাস্তি প্ৰদান কৰা হয়। মাজে মাজে ছ’চিয়েল মিডিয়াত বহু ভিডিঅ’ আৰু বাতৰি ভাইৰেল হৈ পৰে।
ইৰাণত হিজাব সম্পৰ্কে এখন আইন আছে, সেই অনুসৰি প্ৰতিগৰাকী মহিলাই হিজাব পিন্ধাটো বাধ্যতামূলক। এই হিজাব সন্দৰ্ভত এক চাঞ্চল্যকৰ প্ৰতিবেদন ওলাইছে।
১৪ মাৰ্চত প্ৰকাশিত ৰাষ্ট্ৰসংঘৰ এক প্ৰতিবেদনত প্ৰকাশ পাইছে যে, ইৰাণে মহিলাৰ ওপৰত হিজাব আইন বলবৎ কৰিবলৈ ড্ৰোন, মুখ চিনাক্তকৰণ প্ৰযুক্তি আৰু নাগৰিক প্ৰতিবেদন এপ ব্যৱহাৰ কৰিছে। প্ৰতিবেদনত সাজ-পোছাক নিয়ম উলংঘা কৰা মহিলাসকলৰ ওপৰত চোৰাংচোৱাগিৰি আৰু শাস্তি দিয়াৰ ঘটনাও দেখা গৈছে।
এই কাৰ্য্যৰ মূল কেন্দ্ৰবিন্দু হৈছে চৰকাৰী সমৰ্থিত “নাজাৰ” মোবাইল এপ্লিকেচন। যাৰ ফলত নাগৰিক আৰু আৰক্ষীয়ে মহিলাসকলক অভিযোগ কৰা উলংঘাৰ খবৰ দিব পাৰে। এই এপটোৱে হিজাব আইন উলংঘা কৰাসকলক সকীয়াই দিব আৰু এই সতৰ্কবাণীক আওকাণ কৰিলে তেওঁলোকৰ বাহনো জব্দ কৰা হ’ব।
এক গৱেষণাত দেখা গৈছে যে, ৰাজধানী তেহৰাণ আৰু দক্ষিণ ইৰাণতো কৰ্তৃপক্ষই ৰাজহুৱা স্থান নিৰীক্ষণ আৰু হিজাব নিৰীক্ষণৰ বাবে আকাশী ড্ৰোন নিয়োগ কৰিছে, ইয়াৰ উপৰিও ৰাজপথত বহু উচ্চ প্ৰযুক্তিৰ কেমেৰাও স্থাপন কৰিছে।
ইৰাণত কাৰ্যকৰী হোৱা এই নতুন আইনসমূহ কেৱল দেশৰ ভিতৰতে নহয়, আন্তঃৰাষ্ট্ৰীয় পৰ্যায়তো বিতৰ্কৰ কাৰণ হৈ পৰিছে। মানৱ অধিকাৰ সংগঠন আৰু বিশ্ব সমাজে এই আইনক নাৰীৰ অধিকাৰ উলংঘা বুলি গণ্য কৰি প্ৰতিবাদ সাব্যস্ত কৰিছে। তেওঁলোকে কয় যে, এই পদক্ষেপে নাৰীৰ স্বাধীনতা আৰু অধিকাৰ খৰ্ব কৰিছে।
