ইজৰাইলে গাজাত পুনৰ আক্ৰমণ আৰম্ভ কৰাৰ পাছৰে পৰা ৭০০ৰো অধিক পেলেষ্টাইনীয়ে প্ৰাণ হেৰুৱায়। সোমবাৰে ইজৰাইলী সেনাই গাজাৰ নাছেৰ হাস্পতালত আক্ৰমণ চলোৱাৰ ফলত হামাছৰ নেতা ইছমাইল বৰহৌমকে ধৰি কমেও দুজন লোকৰ প্ৰাণহানি হয়।
ইজৰাইলী বাহিনীয়ে গাজাৰ আল-মাৱাছিত তম্বুত বোমা বিস্ফোৰণ ঘটাই হামাছৰ ৰাজনৈতিক ব্যুৰোৰ আন এজন সদস্য ছালাহ আল-বৰ্দাৱীক শেষ কৰাৰ কেইঘণ্টামানৰ পিছতেই এই কাণ্ড সংঘটিত হয়।
ইফালে গাজাৰ স্বাস্থ্য মন্ত্ৰালয়ে নতুন পৰিসংখ্যা প্ৰকাশ কৰি কয় যে, গাজাৰ বিৰুদ্ধে ইজৰাইলৰ যুদ্ধ আৰম্ভ হোৱাৰ পৰাই কমেও ৫০,০২১ জন পেলেষ্টাইনী লোকৰ প্ৰাণ হেৰুওৱা বুলি নিশ্চিত হয় আৰু ১১৩,২৭৪ জন আহত হয়।
গাজাৰ ৰাষ্ট্ৰীয় সংবাদ মাধ্যমৰ কাৰ্যালয়ে প্ৰাণ হেৰুওৱা লোকৰ সংখ্যা ৬১,৭০০ৰো অধিক বুলি প্ৰকাশ কৰি কয় যে ধ্বংসাৱশেষৰ তলত নিৰুদ্দেশ হোৱা হাজাৰ হাজাৰ পেলেষ্টাইনী লোকৰ মৃত্যুৰ আশংকা কৰা হৈছে।
কেইবামাহো ধৰি যুদ্ধৰ ফলত গৃহহীন হৈ বহু পেলেষ্টাইনী লোকসকলে জানুৱাৰী মাহৰ পৰা আৰম্ভ হোৱা যুদ্ধবিৰতিৰ ফলত নিজৰ গৃহলৈ উভতি আহে। ইজৰাইলী সেনাই দেওবাৰে কয় যে, ৰাফাহৰ এটা অংশত আক্ৰমণ আৰম্ভ কৰাৰ সময়তে দক্ষিণ গাজাৰ পৰা পেলেষ্টাইনীসকলক উলিয়াই অনাৰ নিৰ্দেশ দিয়া হৈছে।
বিগত সপ্তাহত ইজৰাইলী সেনাই ঘোষণা কৰিছিল যে, তেওঁলোকে নেটজাৰিম কৰিডৰৰ কিছু অংশ পুনৰ দখল কৰিছে। উল্লেখ্য যে নেটজাৰিম কৰিডৰে দক্ষিণ আৰু উত্তৰ গাজাক পৃথক কৰে।
জানুৱাৰী মাহত যুদ্ধবিৰতিৰ আৰম্ভণিতে এই কৰিডৰৰ পৰা সৈন্য আঁতৰি গৈছিল। তাত থকা হাজাৰ হাজাৰ পেলেষ্টাইনী এতিয়া ঘৰলৈ উভতি অহাৰ মাত্ৰ কেইসপ্তাহমানৰ পিছতে গৃহ খালী কৰাৰ নিৰ্দেশৰ সন্মুখীন হৈছে।
