ইজৰাইলৰ এক নিৰাপত্তা সংস্থাই প্ৰকাশ কৰিছে এক ডাঙৰ তথ্য। প্ৰতিবেদন অনুসৰি, মধ্য ইজৰাইলৰ এজন সুপৰিচিত চৰকাৰ বিৰোধী কৰ্মীক দুসপ্তাহ পূৰ্বে প্ৰধানমন্ত্ৰী বেঞ্জামিন নেতান্যায়াহুক হত্যাৰ ষড়যন্ত্ৰৰ অভিযোগত গ্ৰেপ্তাৰ কৰা হৈছিল। এতিয়া ইজৰাইল আৰক্ষীয়েও এই বিষয়টো নিশ্চিত কৰিছে।
আৰক্ষীৰ তথ্য অনুসৰি, ৭০ বছৰীয়া মহিলাগৰাকীক আৰক্ষী আৰু শ্বিন বেট নিৰাপত্তাৰক্ষীয়ে গ্ৰেপ্তাৰ কৰি তদন্ত অব্যাহত ৰাখিছে। আৰক্ষীয়ে জনোৱা মতে, প্ৰধানমন্ত্ৰীৰ নিৰাপত্তাৰ ব্যৱস্থাৰ বিষয়ে অস্ত্ৰ-শস্ত্ৰ আৰু তথ্য লাভ কৰিবলৈ তাই আন প্ৰতিবাদকাৰীৰ সৈতে যোগাযোগ কৰিছিল।
প্ৰতিবেদনত কোৱা হৈছে যে দুসপ্তাহ পূৰ্বে টেল আভিভৰ এই মহিলাগৰাকীক গ্ৰেপ্তাৰ কৰা হৈছিল আৰু তাৰ পিছত প্ৰধানমন্ত্ৰী আৰু চৰকাৰী ভৱনৰ পৰা আঁতৰি থকাৰ নিৰ্দেশ দি মুকলি কৰি দিয়া হৈছিল।
প্ৰতিবেদনত আৰু কোৱা হৈছে যে মঙলবাৰে মহিলাগৰাকীৰ বিৰুদ্ধে অপৰাধমূলক আৰু সন্ত্ৰাসবাদৰ অভিযোগ ৰুজু কৰা হৈছে। লগতে আদালতে জাৰি কৰা গেগ অৰ্ডাৰৰ বাবে সন্দেহজনক লোকজনৰ নাম আৰু ঠিকনা সম্পৰ্কে তথ্য দিব নোৱাৰাৰ কথাও উল্লেখ কৰিছে আৰক্ষীয়ে।
এতিয়ালৈকে ইজৰাইলে নিজৰ চোৰাংচোৱাৰ জৰিয়তে ইৰাণত নেতাক হত্যা কৰি আহিছে আৰু ইৰাণৰ বিৰোধী নেতা, কৰ্মী আদি ইজৰাইলৰ সৈতে সংস্পৰ্শত থকা বুলিও বহু বাতৰি প্ৰকাশ পাইছে। ইৰাণৰ পৰাও নেতানিয়াহুক হত্যাৰ আহ্বান উত্থাপন হৈছে। এনে পৰিস্থিতিত মানুহেও এই মহিলাগৰাকীক ইৰাণৰ সৈতে সংযোগ কৰি দেখিছে যে ইৰাণেও ইজৰাইলত নিজৰ চোৰাংচোৱা নেটৱৰ্ক গঢ়ি তুলিছে।
