আজি গুজৰাটৰ কণ্ডলা বন্দৰত উপস্থিত হোৱাৰ কথা আছে ২০,৪০০ মেট্ৰিক টন এল পি জি কঢ়িয়াই ভাৰতৰ পতাকা থকা জাহাজ জগ বিক্ৰম। এই তথ্য প্ৰদান কৰিছে বন্দৰ, ভাৰতৰ জাহাজ আৰু জলপথ মন্ত্ৰালয়ে।
অতিৰিক্ত সচিব মুকেশ মংগলে কয় যে জাহাজখনে যোৱা ১১ এপ্ৰিলত হৰমুজ জলদ্বীপ অতিক্ৰম কৰিছে। এই যাত্ৰা নতুন দিল্লীৰ বাবে এক উল্লেখযোগ্য সফলতা বুলি বিবেচিত হৈছে, কিয়নো আমেৰিকা আৰু ইৰাণৰ মাজত ১৪ দিনীয়া যুদ্ধবিৰতি ঘোষণা কৰাৰ পিছত এইখনেই হৈছে এই সাগৰীয় পথেৰে পাৰ হোৱা প্ৰথমখন ভাৰতীয় জাহাজ। জাহাজখনত মুঠ ২৪ জন ভাৰতীয় নাৱিক আছে।
মন্ত্ৰালয়ে এতিয়ালৈকে কেৱল যোৱা ২৪ ঘণ্টাত ৯৩ জনকে ধৰি ২১৭৭ জনতকৈ অধিক ভাৰতীয় নাৱিকক নিৰাপদে উভতি অহাটো নিশ্চিত কৰিছে। এই প্ৰক্ৰিয়াত বৈদেশিক পৰিক্ৰমা মন্ত্ৰালয়, ভাৰতীয় মিছন, আৰু সামুদ্ৰিক অংশীদাৰসকলৰ সৈতে অহৰহ সমন্বয় বজাই ৰখা হৈছে। ভাৰতীয় বন্দৰসমূহত স্বাভাৱিক কাম-কাজ নিশ্চিত কৰিছে মন্ত্ৰালয়ে। ভাৰতৰ সকলো বন্দৰতে কাম-কাজ সুচাৰুৰূপে চলি আছে আৰু কোনো ধৰণৰ যানজঁট বা ভিৰ হোৱাৰ খবৰ পোৱা নাই। কিয়নো নাৱিকসকলৰ মংগল সুনিশ্চিত কৰাটো মন্ত্ৰালয়ৰ অগ্ৰাধিকাৰ।
আঞ্চলিক উত্তেজনাৰ মাজতো মন্ত্ৰালয়ে নিৰন্তৰ নিৰীক্ষণ আৰু সমন্বয়ৰ জৰিয়তে ভাৰতীয় জাহাজসমূহৰ সুৰক্ষা সুনিশ্চিত কৰি আছে। যুদ্ধবিৰতিৰ পিছত ক্ৰমান্বয়ে সামুদ্ৰিক যাতায়ত ঘূৰি অহাৰ প্ৰমাণ জাহাজ জগ বিক্ৰমৰ সফল প্ৰত্যাৱৰ্তন। ভাৰতে উপসাগৰীয় অঞ্চলৰ দেশৰ পৰা প্ৰায় ৯০ শতাংশ এল পি জি আমদানি কৰে। গতিকে হৰমুজ জলদ্বীপৰ দৰে এক গুৰুত্বপূৰ্ণ পথৰ নিৰাপত্তা আৰু মসৃণ পৰিচালনা ভাৰতৰ শক্তি সুৰক্ষাৰ বাবে অতি গুৰুত্বপূৰ্ণ।
