ভাৰত আৰু নিউজিলেণ্ডৰ মাজত চলি থকা টেষ্ট শৃংখলাৰ দ্বিতীয়খন মেচ পুনেৰ মহাৰাষ্ট্ৰ ক্ৰিকেট এছ’চিয়েশ্যন ষ্টেডিয়ামত চলি আছে। শৃংখলাৰ প্রথমখন খেলৰ প্রথম ইনিংছত মাত্র ৪৬ ৰানত অল আউট হোৱা ভাৰতীয় দলটোৰ অতি শোচনীয় বেটিং প্ৰদৰ্শন এইখন মেচতো অব্যাহত আছে।
দীৰ্ঘদিনৰ মূৰত টেষ্ট দললৈ উভতি অহা ৱাশ্বিংটন সুন্দৰে নিজৰ সৰ্বোচ্চ প্ৰচেষ্টাৰে প্ৰথম দিনা চালকৰ আসনত বহুৱাইছিল টিম ইণ্ডিয়াক।
কিন্তু দ্বিতীয় দিনা ভাৰতীয় বেটছমেনসকলৰ শোচনীয় প্ৰদৰ্শনৰ ফলত মাত্ৰ ১৫৬ ৰানতে প্ৰথম ইনিংছ সামৰে। ভাৰতৰ হৈ সৰ্বাধিক ৩৮ ৰান সংগ্ৰহ কৰে ৰবীন্দ্ৰ জাদেজাই। আনহাতে যশস্বী জয়ছৱাল আৰু শুভমন গিলে ৩০-৩০ ৰানৰ অৱদান আগবঢ়ায়।
ভাৰতীয় বেটছমেনৰ এই শোচনীয় প্ৰদৰ্শনৰ মূলতেই হ’ল মিচেল ছাণ্টনাৰ। ছাণ্টনাৰে ৭গৰাকী ভাৰতীয় বেটাৰৰ উইকেট দখল কৰে।
ভাৰতীয় বেটাৰৰ শোচনীয় প্ৰদৰ্শনৰ মাজতে অ’পেনিং বেটছমেন যশস্বী জয়ছৱালে নিজৰ নামত এক ডাঙৰ অভিলেখ গঢ়িবলৈ সক্ষম হৈছে। জয়ছৱালে চলিত বৰ্ষত টেষ্টত ১০০০ ৰান সম্পূৰ্ণ কৰিছে।
২৩ বছৰ বয়সৰ পূৰ্বে এটা কেলেণ্ডাৰ বছৰত ১০০০ৰো অধিক টেষ্ট ৰান কৰা প্ৰথমজন টেষ্ট বেটছমেন হিচাপে পৰিগণিত হৈছে যশস্বী জয়ছৱাল। তেওঁৰ পূৰ্বে কোনো ভাৰতীয় বেটছমেনে এই কৃতিত্ব অৰ্জন কৰিবলৈ সক্ষম হোৱা নাই।
টেষ্ট ক্ৰিকেটত এই পৰ্যন্ত মাত্ৰ চাৰিজন বেটছমেনেহে এই কৃতিত্ব গঢ়িবলৈ সক্ষম হৈছে। ২৩ বছৰ সম্পূৰ্ণ কৰাৰ পূৰ্বে এটা কেলেণ্ডাৰ বছৰত ১০০০+ টেষ্ট ৰান কৰা খেলুৱৈৰ তালিকাত আছে গাৰ্ফিল্ড ছ’বাৰ্ছ, গ্ৰেম স্মিথ, এ বি ডি ভিলিয়াৰ্ছ আৰু এলাষ্টাৰ কুক।
১৯৫৮ চনত ছ’বাৰ্ছে ১১৯৩ ৰান সংগ্ৰহ কৰাৰ বিপৰীতে ২০০৩ চনত গ্ৰেম স্মিথে ১১৯৮ ৰান সংগ্ৰহ কৰিছিল। আনহাতে ২০০৫ চনত এ বি ডি ভিলিয়াৰ্ছে ১০০৮ ৰান আৰু ইংলেণ্ডৰ প্ৰাক্তন অধিনায়ক এলাষ্টাৰ কুকে ২০০৬ চনত ১০১৩ ৰান সংগ্ৰহ কৰিছিল।
