জম্মু-কাশ্মীৰত বিশেষ ৰাজ্যৰ মৰ্যদা কৰ্তন হোৱাৰ পিছত পোন প্ৰথমবাৰৰ বাবে বিধানসভা নিৰ্বাচন অনুষ্ঠিত হোৱাৰ দিশে। ২০১৯ চনত জম্মু-কাশ্মীৰৰ পৰা কৰ্তন কৰা হৈছিল বিশেষ ৰাজ্যৰ মৰ্যদা। বিশেষ ৰাজ্যৰ মৰ্যদা কৰ্তন কৰি জম্মু-কাশ্মীৰক স্বায়ত্ব শাসিত পৰিষদ অঞ্চল ঘোষণা কৰা হৈছিল। লাডাখকো কেন্দ্ৰীয় শাসিত অঞ্চল ঘোষণা কৰিছিল কেন্দ্ৰই।
জম্মু-কাশ্মীৰত অনুষ্ঠিত হ’বলগীয়া বিধানসভা নিৰ্বাচন তিনিটা পৰ্যায়ত অনুষ্ঠিত হ’ব।
ইয়াৰ পূৰ্বে জম্মু-কাশ্মীৰত ২০১৪ চনত নিৰ্বাচন অনুষ্ঠিত হৈছিল। একেদৰে, ২০১৮ চনত বিজেপি আৰু পিডিপিৰ মহাজোঁট বন্ধন চৰকাৰৰ পতন হৈছিল জম্মু-কাশ্মীৰত। সেই সময়ত দুয়োটা দলৰ মত বিৰোধৰ বাবে বিজেপিয়ে পিডিপিৰ পৰা নিজৰ সমৰ্থন উভতাই আনিছিল।
চৰকাৰৰ পতন হোৱাৰ পিছত জম্মু-কাশ্মীৰত বিগত ৬ বছৰৰ পৰাই কেন্দ্ৰৰ শাসন চলিছিল। এই সময়ছোৱাত জম্মু-কাশ্মীৰত উপ-ৰাজ্যপাল মনোজ সিনহাই জম্মু-কাশ্মীৰৰ বাঘজৰী হাতত লৈছিল।
আনহাতে, জম্মু-কাশ্মীৰৰ ৰাজনৈতিক দলসমূহে বিধানসভা নিৰ্বাচন অনুষ্ঠিত কৰাৰ বাবে দাবী কৰি আহিছে। এই সন্দৰ্ভত নিৰ্বাচন আয়োগে দিল্লীত এক সংবাদমেলযোগে জনাই, জম্মু-কাশ্মীৰত সৰ্বমুঠ ভোটদাতাৰ সংখ্যা ৮৭.০৯ লাখ।
২০২২ চনত জম্মু-কাশ্মীৰক সীমিত কৰি সাতখন নতুন আসন যোগ দিয়া হৈছে আৰু এতিয়া ৮৩ খন আসনৰ পৰিৱৰ্তে নতুন বিধানসভাত ৯০ খন আসন থাকিব।
উল্লেখ্য যে, ২০১৯ চনৰ ৫ আগষ্টত জম্মু-কাশ্মীৰৰ বিশেষ মৰ্যাদা বিলুপ্ত কৰাৰ পিছত জম্মু-কাশ্মীৰৰ ৰাজনৈতিক দলবোৰে ৰাজ্যৰ মৰ্যাদা ঘূৰাই দিয়াৰ দাবী জনাইছে। ২০১৯ চনত বিশেষ মৰ্যাদা প্ৰত্যাহাৰ কৰাৰ পিছত জম্মু-কাশ্মীৰত দীঘলীয়া কাৰ্ফিউ আৰু নিষেধাজ্ঞা জাৰি কৰা হৈছিল আৰু ইণ্টাৰনেট কৰ্তন কৰা হৈছিল।
আনহাতে, নিৰ্বাচন অনুষ্ঠিত কৰাৰ ঘোষণা কৰাৰ পিছতে জম্মু-কাশ্মীৰৰ সাধাৰণ লোক, ৰাজনৈতিক দল আৰু বিশ্লেষকসকলে জম্মু-কাশ্মীৰৰ বিধানসভা নিৰ্বাচন ঘোষণা সন্দৰ্ভত তেওঁলোকৰ ভিন্ন মতামত প্ৰকাশ কৰিছে।
প্ৰাক্তন মুখ্যমন্ত্ৰী তথা নেচনেল কনফাৰেন্সৰ সভাপতি ড০ ফাৰুক আব্দুল্লাই বিবিচিক কয় যে, তেওঁ নিৰ্বাচনৰ ঘোষণাক আদৰণি জনাইছে।
এই সন্দৰ্ভত তেওঁ কয়,”মই আজি বহুত সুখী। এয়া আল্লাৰ অনুগ্ৰহ। উচ্চতম ন্যায়ালয়ৰ সহায়ত নিৰ্বাচন আয়োগে তাৰিখৰ সৈতে নিৰ্বাচন ঘোষণা কৰে, আমি নিৰ্বাচন আয়োগক সকলো ৰাজনৈতিক দলে তেওঁলোকৰ ভূমিকা পালন কৰাৰ সুযোগ দিবলৈ অনুৰোধ কৰিম আৰু এই নিৰ্বাচন সুস্থিৰভাৱে অনুষ্ঠিত কৰিবলৈ অনুৰোধ জনাম।“
উল্লেখ্য যে, নিৰ্বাচন ঘোষণা হোৱাৰ কেইদিনমান পূৰ্বে জম্মু-কাশ্মীৰ চৰকাৰে ১০০ ৰো অধিক বিষয়াক বদলি কৰিছিল।
