চলিত ব’ৰ্ডাৰ-গাভাস্কাৰ ট্ৰফীৰ চতুৰ্থখন টেষ্টৰ দ্বিতীয় ইনিংছত এক বিৰল অভিলেখৰ গৰাকী হ’ল যশপ্ৰীত বুমৰাহ। বুমৰাহৰ বিধ্বংসী বলিঙত দিশহাৰা হৈ পৰে অষ্ট্ৰেলিয়াৰ বেটাৰ। এই ইনিংছটোতে এক বিশেষ কৃতিত্ব গঢ়িবলৈ সক্ষম হয় বুমৰাহ।
অষ্ট্ৰেলিয়াই দ্বিতীয় ইনিংছৰ প্ৰথম ৯১ ৰানতে হেৰুৱাইছিল ৬টা উইকেট। এই ৬টা উইকেটৰ চাৰিটা উইকেটে দখল কৰিছিল বুমৰাহে। ট্ৰেভিছ হেডক আউট কৰাৰ লগে লগে ইতিহাসৰ সোণালী পৃষ্ঠাত নাম লিপিবদ্ধ হ’ল বুমৰাহৰ নাম। হেডৰ উইকেটটো লাভ কৰাৰ লগে লগে টেষ্ট ক্ৰিকেটত তেওঁ সম্পূৰ্ণ কৰে ২০০ উইকেট।
বল হিচাপত সবাটোকৈ দ্ৰুতগতিত ২০০ উইকেট সম্পূৰ্ণ কৰা ভাৰতীয় বলাৰত পৰিণত হ’ল বুমৰাহ। এই ক্ষেত্ৰত বুমৰাহে অতিক্ৰম কৰে মহম্মদ ছামীক। ছামীয়ে ৯৮৯৬টা বলত আৰু বুমৰাহে ৮৪৮৪টা বলত ২০০ উইকেট সম্পূৰ্ণ কৰে।
বল হিচাপত সৰ্বাধিক দ্ৰুত গতিত ২০০ উইকেট সম্পূৰ্ণ কৰাৰ ক্ষেত্ৰত বুমৰাহৰ আগত আছে ৱাকাৰ ইউনুছ (পাকিস্তান, ৭৭২৫টা বল), ডেল ষ্টেইন (দক্ষিণ আফ্ৰিকা, ৭৮৪৮টা বল) আৰু কাগিছো ৰাবাডা (দক্ষিণ আফ্ৰিকা ৮১৫৩টা বল)।
ইফালে টেষ্ট মেচৰ সংখ্যা হিচাপত দ্ৰুতগতিত ২০০ উইকেট সম্পূৰ্ণ কৰা ভাৰতীয় বলাৰৰ তালিকাত ৰবীন্দ্ৰ জাদেজাৰ সৈতে যুটীয়াভাৱে দ্বিতীয় স্থানত আছে বুমৰাহ। এই ক্ষেত্ৰত তালিকাৰ শীৰ্ষত আছে অশ্বিন। অশ্বিনে ৩৮খন মেচত ২০০ উইকেট সম্পূৰ্ণ কৰিছিল।
আনহাতে বুমৰাহে গঢ়ে আন এক অভিলেখ। ২০০ বা তাতোকৈ অধিক টেষ্ট উইকেট দখল কৰাৰ ক্ষেত্ৰত সৰ্বশ্ৰেষ্ঠ গড়ৰ বলাৰত পৰিণত হৈছে বুমৰাহ। বুমৰাহে ৱেষ্ট ইণ্ডিজৰ মহান মালকম মাৰ্ছেল, জুৱেল গাৰ্নাৰ আৰু কাৰ্টলী এম্ব্ৰোজক অতিক্ৰম কৰে। বুমৰাহে এতিয়ালৈকে ৪৪খন মেচত ১৯.৩৮ গঢ়ে ২০২ টা উইকেট দখল কৰিছে।
টেষ্টত সৰ্বশ্ৰেষ্ঠ গড় (নূন্যতম ২০০ উইকেট)
যশপ্ৰীত বুমৰাহ (ভাৰত)- ২০২টা উইকেট (গড়-১৯.৩৮)
মালকম মাৰ্ছেল (ৱেষ্ট ইণ্ডিজ)- ৩৭৬টা উইকেট (গড়-২০.৯৪)
জুৱেল গাৰ্নাৰ (ৱেষ্ট ইণ্ডিজ)- ২৫৯টা উইকেট (গড়-২০.৯৭)
কাৰ্টলী এম্ব্ৰোজ (ৱেষ্ট ইণ্ডিজ)- ৪০৫টা উইকেট (গড়-২০.৯৯)
ফ্ৰেড ট্ৰুমেন (ইংলেণ্ড)- ৩০৭টা উইকেট (গড় ২১.৫৭)
