জশপ্ৰীত বুমৰাহে অষ্ট্ৰেলিয়াৰ বিৰুদ্ধে খেলা তৃতীয়খন টেষ্টত সুন্দৰ বলিং প্ৰদৰ্শন কৰি পাঁচটা উইকেট দখল কৰি এক বিশেষ কৃতিত্ব গঢ়িবলৈ সক্ষম হয়। অষ্ট্ৰেলিয়াৰ বিৰুদ্ধে তৃতীয়খন টেষ্টৰ প্ৰথম ইনিংছত পাঁচটা উইকেট দখল কৰাৰ লগে লগে SENA দেশত ভাৰতৰ হৈ এটা ইনিংছত সৰ্বাধিকবাৰ পাঁচটা উইকেট দখল কৰাৰ অভিলেখ গঢ়িবলৈ সক্ষম হয়।
সাম্প্ৰতিক সময়ৰ শ্ৰেষ্ঠতম বেগীবলাৰ বুমৰাহে কপিল দেৱৰ অভিলেখ ভংগ কৰে। SENA (দক্ষিণ আফ্ৰিকা, ইংলেণ্ড, নিউজিলেণ্ড আৰু অষ্ট্ৰেলিয়া) দেশত বুমৰাহে এতিয়ালৈ ৮ বাৰ এটা ইনিংছত পাঁচটা উইকেট দখল কৰিছে। আনহাতে কপিল দেৱে ৭ বাৰ পাঁচটা উইকেট দখল কৰিছিল। ইফালে জাহিৰ খানে ৬ বাৰ এই কৃতিত্ব গঢ়িছিল।
SENA দেশত এটা ইনিংছত পাঁচটা উইকেট দখল কৰা ভাৰতীয় বলাৰ
৮ বাৰ- জশপ্ৰীত বুমৰাহ
৭ বাৰ- কপিল দেৱ
৬ বাৰ- জাহিৰ খান
৬ বাৰ- বী চন্দ্ৰশেখৰ
উল্লেখ্য যে, অষ্ট্ৰেলিয়াৰ বিৰুদ্ধে চলি থকা টেষ্ট শৃংখলাৰ প্ৰথম মেচখনতো বুমৰাহে এটা ইনিংছত পাঁচটা উইকেট দখল কৰিছিল। ইয়াৰ পিছত তৃতীয়খন টেষ্টতো পাঁচটা উইকেট দখল কৰি ইতিহাস ৰচিবলৈ সক্ষম হয়। টেষ্ট ক্ৰিকেটত বুমৰাহে এতিয়ালৈকে এটা ইনিংছত ১২ বাৰ পাঁচটা উইকেট দখল কৰিছে। ইয়াৰ উপৰি ভাৰতৰ বাহিৰত বুমৰাহে এই পৰ্যন্ত ১০ বাৰ পাঁচটা উইকেট লাভ কৰিছে। এইক্ষেত্ৰত তেওঁ স্পৰ্শ কৰিছে অনিল কুম্বলেৰ অভিলেখ। বিদেশী ভূমিত কুম্বলেই এটা ইনিংছত ১০বাৰ পাঁচটা উইকেট লাভ কৰিছিল।
বিদেশী ভূমিত এটা ইনিংছত সৰ্বাধিকবাৰ পাঁচটা উইকেট দখল কৰা ভাৰতীয় বলাৰ
১২- কপিল দেৱ
১০- জশপ্ৰীত বুমৰাহ
১০- অনিল কুম্বলে
৯- ঈশান্ত শৰ্মা
৮- ভগৱন্ত চন্দ্ৰশেখৰ
৮- আৰ অশ্বিন
স্মৰ্তব্য যে, টেষ্ট ক্ৰিকেটত ভাৰতৰ হৈ সৰ্বাধিকবাৰ এটা ইনিংছত পাঁচটা উইকেট দখল কৰা বেগী বলাৰ হৈছে কপিল দেৱ। দ্বিতীয় স্থানত আছে জশপ্ৰীত বুমৰাহ।
সৰ্বাধিকবাৰ এটা ইনিংছত পাঁচটা উইকেট দখল কৰা বেগী বলাৰ
২৩- কপিল দেৱ
১২- জশপ্ৰীত বুমৰাহ
১১- জাহিৰ খান
১১- ঈশান্ত শৰ্মা
১০- জৱাগল শ্ৰীনাথ
