চলিত বছৰৰ শেষৰ ফালে অনুষ্ঠিত হ’ব বিহাৰ বিধানসভা নিৰ্বাচন। ইয়াৰ বাবে সাজু হৈ উঠিছে প্ৰতিটো ৰাজনৈতিক দল। সাধাৰণ বাজেটত বিহাৰক লৈ কেইবাটাও ডাঙৰ ঘোষণা কৰাৰ সমান্তৰালকৈ প্ৰধানমন্ত্ৰী নৰেন্দ্ৰ মোদীৰ মৰিছাছ ভ্ৰমণতো বিহাৰ নিৰ্বাচনৰ প্ৰভাৱ পৰা পৰিলক্ষিত হয়।
মৰিছাছত প্ৰধানমন্ত্ৰী মোদীয়ে ভোজপুৰী ভাষাত নিজৰ ভাষণ আৰম্ভ কৰাৰ লগতে দেশখনৰ প্ৰধানমন্ত্ৰীক উপহাৰ হিচাপে দিছিল বিহাৰত উৎপাদিত মখানা। মুঠৰ ওপৰত বিহাৰৰ নিৰ্বাচনক লৈ এতিয়াৰে পৰা আৰম্ভ হৈছে তীব্ৰ চৰ্চা।
নিৰ্বাচনক লৈ চলি থকা জল্পনা-কল্পনাৰ মাজতে এন ডি এৰ এগৰাকী নেতাই বিহাৰ নিৰ্বাচনৰ ফলাফল কি হ’ব তাৰ ভবিষ্যৎ বাণী কৰিছে। জনতা দল ইউনাইটেডৰ নেতা সঞ্জয় ঝায়ে দাবী কৰি কয় যে তেওঁলোকে ২০১০ চনতকৈও অধিক আসন পাব এইবাৰৰ নিৰ্বাচনত।
জে ডি ইউৰ কাৰ্যকৰী সভাপতি সঞ্জয় ঝাই এটা সাক্ষাতকাৰত কয় যে ২০১০ চনৰ নিৰ্বাচনত বিজেপি মিত্ৰজোঁটে ২০৬খন আসনত জয় লাভ কৰিছিল, কিন্তু এইবাৰ ইয়াতকৈও অধিক আসন লাভ কৰিম।
উল্লেখ্য যে, ২০২০ চনৰ নিৰ্বাচনত এন ডি এই লাভ কৰিছিল ১২৫খন আসন। ইয়াৰ ভিতৰত বিজেপিয়ে ৭৪ আৰু জেডিইউয়ে ৪৩খন আসনত জয়ী হৈছিল। বিজেপিতকৈ কম আসনত জয়ী হোৱাৰ পিছতো মুখ্যমন্ত্ৰীৰ আসনত অধিষ্ঠিত হৈছিল নীতিশ কুমাৰ।
সেইবাৰৰ নিৰ্বাচনত বিৰোধী মিত্ৰজোঁটে লাভ কৰিছিল ১২৫খন আসন। বিৰোধী মিত্ৰজোঁটত আছিল কংগ্ৰেছ, আৰজেডি আৰু কমিউনিষ্ট পাৰ্টি। ইয়াৰে লালু প্ৰসাদ যাদৱ নেতৃত্বাধীন আৰজেডিৰ প্ৰদৰ্শন আছিল চমকপ্ৰদ। তেজস্বী যাদৱৰ নেতৃত্বত নিৰ্বাচনত অৱতীৰ্ণ হোৱা আৰজেডিয়ে ৭৫খন আসনেৰে ৰাজ্যৰ সৰ্ববৃহত দল হিচাপে পৰিগণিত হৈছিল। আনহাতে কংগ্ৰেছ দলে লাভ কৰিছিল ১৯খন আসন। অৰ্থাত যোৱাবাৰৰ নিৰ্বাচনত তীব্ৰ যুঁজ হৈছিল বিৰোধী আৰু এন ডি এৰ মাজত।
২৪৩খন আসনযুক্ত বিহাৰ বিধাসভাত সংখ্যাগৰিষ্ঠতাৰ বাবে প্ৰয়োজন হয় ১২২ খন আসনৰ।
ইফালে ২০২৪ চনৰ লোকসভা নিৰ্বাচনত বিৰোধী মিত্ৰজোঁটক অনায়াসে ধৰাশায়ী কৰিছিল বিজেপি নেতৃত্বাধীন মিত্ৰজোঁটে। ৪০টা লোকসভা সমষ্টিৰ ভিতৰত ৩১টাতেই জয়ী হৈছিল এন ডি এ। আনহাতে ইণ্ডি মিত্ৰজোঁটে লাভ কৰিছিল মাত্ৰ ৯খন আসন।
