দুৰ্দান্ত ফৰ্মত থকা ইংলেণ্ডৰ তাৰকা বেটাৰ জ’ ৰুটৰ নামত সংযোজন হ’ল এক বিশেষ অভিলেখ। সাম্প্ৰতিক সময়ৰ অন্যতম শ্ৰেষ্ঠ টেষ্ট বেটাৰ ৰুটে শ্ৰীলংকাৰ প্ৰাক্তন ক্ৰিকেটাৰ সনথ জয়সূৰ্যৰ অভিলেখ ভংগ কৰি বিশেষ কৃতিত্ব গঢ়িবলৈ সক্ষম হৈছে।
জ’ ৰুটে আন্তঃৰাষ্ট্ৰীয় ক্ৰিকেটত সৰ্বাধিক ৰান সংগ্ৰহ কৰাৰ ক্ষেত্ৰত শ্ৰীলংকাৰ মহান ক্ৰিকেটাৰ সনথ জয়সূৰ্যৰ অভিলেখ ভংগ কৰে। আন্তঃৰাষ্ট্ৰীয় ক্ৰিকেটত এতিয়ালৈকে জ’ ৰুটে ৫৪টা শতক আৰু ১১২টা অৰ্ধশতকৰ সহায়ত সংগ্ৰহ কৰিছে ২১০৫৩ ৰান। ইফালে ৪২টা শতক আৰু ১০৩টা অৰ্ধশতকেৰে জয়সূৰ্যই আন্তঃৰাষ্ট্ৰীয় কেৰিয়াৰত সংগ্ৰহ কৰিছে ২১০৩২ ৰান।
আন্তঃৰাষ্ট্ৰীয় ক্ৰিকেটত সৰ্বাধিক ৰান সংগ্ৰহ কৰা বেটছমেনৰ তালিকাৰ শীৰ্ষত আছে ভাৰতৰ মহান বেটছমেন শচীন তেণ্ডুলকাৰ। আন্তঃৰাষ্ট্ৰীয় ক্ৰিকেটত শচীন তেণ্ডুলকাৰে ৩৪৩৫৭ ৰান সংগ্ৰহ কৰে। শচীনৰ নামত আছে ১০০টা শতক আৰু ১৬৪টা অৰ্ধশতক।
এই তালিকাত দ্বিতীয় স্থানত আছে শ্ৰীলংকাৰ প্ৰাক্তন বেটছমেন কুমাৰ ছাংগাকাৰা। আন্তঃৰাষ্ট্ৰীয় ক্ৰিকেটত কুমাৰ ছাংগাকাৰাই ২৮০১৬ ৰান সংগ্ৰহ কৰে। ছাংগাকাৰাই ৬৩টা শতক আৰু ১৫৩টা অৰ্ধশতক অৰ্জন কৰে।
উল্লেখ্য যে, ভাৰতৰ বিৰুদ্ধে চলি থকা টেষ্ট শৃংখলাৰ প্ৰথমখন মেচৰ প্ৰথম ইনিংছত ২৮ ৰানত আউট হয় জ’ ৰুট। দীঘলীয়া ইনিংছ খেলাত ব্যৰ্থ হ’লেও আন্তঃৰাষ্ট্ৰীয় কেৰিয়াৰত তেওঁৰ নামত সংযোজন হয় এই বিশেষ অভিলেখ।
